''Հաղորդակցութիւն եւ ողորմութիւն. պտղաբեր հանդիպում'' Ընկերային հաղորդամիջոցներու 2016ի համաշխարհային օրուան նիւթը

(Ռատիօ Վատիկան) Հրատարակուեցաւ 2016-ի  Ընկերային հաղորդակցութեան միջոցներու համաշխարհային օրուան նիւթը ` ''Հաղորդակցութիւն եւ ողորմութիւն. պտղաբեր հանդիպում'' բնաբանով։

Յայտնենք թէ Ընկերային հաղորդամիջոցներու համաշխարհային օրը կը նշուի 8 Մայիս 2016-ին, Յիսուսի Համբարձումին տօնին օրը, Պենտեկոստէի կիրակիէն մէկ կիրակի առաջ։

Ընկերային հաղորդամիջոցներուն հայող այս օրը միակ համաշխարհային օրն է որ հաստատուած է Վատիկանեան Բ Տիեզերական ժողովէն, 1963-ին` ''Ինթեր Միրիֆիքա'' հրամանագիրով։

Ընկերային հաղորդամիջոցներու համաշխարհային առաջին օրը նշուեցաւ` 7 մայիս 1967-ին, առ այդ 2016-ին պիտի նշուի համաշխարհային 50-րդ օրը։

Այս առթիւ քահանայապետին հրատարակած պատգամը կը հրատարակուի ամէն տարի`  Ընկերային հաղորդամիջոցներու պաշտպան սուրբ` Սուրբ Ֆրանչիսկոս Սալէսի տօնին օրը 24 յունուարին։