(Ռատիօ Վատիկան) Ֆրանչիսկոս Սրբազան Քահանայապետ՝ Միացեալ Նահանգներ կատարած առաքելական ճամբորդութեան ծիրէն ներս, հինգշաբթի, 24 սեպտեմբերին, Նիւ Եորքի մէջ, տեղական ժամով յետմիջօրէի 5.55-ին, կ՝այցելէ քաղաքին կեդրոնը գտնուող Սան Փաթրիք աթոռանիստ եկեղեցին։
Նիւ Եորքի թեմը հիմնուած է 8 ապրիլ 1808-ին։ Անոր եկեղեցական տարածքն է 12,212 քմք։Նիւ Եորքի քաղաքին բնակչութեան թիւն է 5,807,600։ Կաթողիկէ հաւատացեալները կը հաշուեն 2.613.000՝ բնակչութեան 45 առ հարիւրը։ Թեմը ունի 368 ժողովրդապետութիւններ, 762 թեմական քահանաներ, 1061 կրօնաւորներ, 2695 կրօնաւորուհիներ, 301 մնայուն սարկաւագներ։Նիւ Եորքի թեմը օժտուած է 400 կրթական եւ 1454 բարեսիրական կեդրոններով։ 2014 թուականին, մէկ տարուան ժամանակամիջոցին մկրտեալներուն թիւը եղած է 24.864։
Թեմին արքեպիսկոպոսն է կարդինալ Թիմոթի Մայքլ Տոլըն։ Ան կարդինալ նշանակուած է 18 փետրուար 2012-ին, Բենեդիկտոս ԺԶ քահանայապետի օրով։
Նիւ Եորքի Սան Փաթրիք Աթոռանիստ եկեղեցին։
Սան Փաթրիք Աթոռանիստ եկեղեցւոյ հողամասը գնուած է 1810-ին, Յիսուսեան միաբանութեան կողմէ՝ դպրոց մը կառուցելու նպատակով։ Պիոս Թ քահանայապետ Նիւ Եորքի եկեղեցիին կը շնորէ մետրապոլիտական կարգավիճակ։ Այդ ժամանակաշրջանի թեմի արքեպիսկոպոս Գերապայծառ Ճոն Հուկէսի որշումով՝ դպրոցին տեղ կը կառուցուի Աթոռանիստ եկեղեցին, որուն կառուցման աշխատանքները սկիզբ կ՝առնեն 1858-ին եւ վերջ կը գտնեն 1888-ին։
Նախ քան Ֆրանչիսկոս Պապի Սան Փաթրիք աթոռանիստ եկեղեցւոյ այցելութիւնը, Յովհաննէս Պօղոս Բ Քահանայապետ այցելած է զայն, 2 հոկտեմբեր 1979-ին, իսկ Բենեդիկտոս ԺԶ Պապ՝ 19 ապրիլ 2008-ին։
All the contents on this site are copyrighted ©. |