Եպիսկոպոսական Սիւնհոդոսի հիմնադրութեան 50 ամեակը։

(Ռատիօ Վատիկան) ''Եպիսկոպոսական սիւնհոդոսի'' ստեղծումը կը պարտինք Պօղոս Զ Քահանայապետին որ 15 սեպտեմբեր 1965-ին ''Apostolica Sollicitudo'' հրատարակած ինքնագիր նամակով հիմնեց այս եպիսկոպոսական հաստատութիւնը։ Այս տարի կը նշուի անոր հիմնարկութեան 50-րդ ամեակը։ Սիւնհոդոսը կաթողիկէ եպիսկոպոսներու համախմբումն է որուն պարտականութիւնն է օգնել Քահանայապետին` Անոր յանձնուած տիեզերական եկեղեցւոյ կառավարման առաքելութեան մէջ։

Սիւնհոդոս բառը կը նշանակէ ''միասնաբար ընթանալու ճանապարհ''։ Եկեղեցին, արդարեւ, պատմութեան մէջ միասին քալող ժողովուրդ մըն է, որպէս Աստուծոյ Արքայութեան նշան` նուիրուած համայն մարդկութեան։

Եպիսկոպոսական Սիւնհոդոսը առ այդ ''եպիսկոպոսներու հաւաքականութեան''  հաստատութիւն մըն է'' ի սպաս Սիւնհոդոսական եկեղեցւոյ։

Սիւնհոդոսը խորհրդարան մը չէ որուն որոշումները որոշիչ արժէք ունին, այլ ուղեւորութիւն մըն է որ համայն եկեղեցին կ՛իրագործէ հոգեւոր խորաթափանցութեամբ, հիմնուած Սուրբ Հոգւոյն` Եկեղեցւոյ տուած առաջարկներու վրայ։

Սիւնհոդոսը ունի խորհրդակցական հանգամանք քահանայապետական ուսուցումին ի սպաս։ Ան կը քննարկէ այն ինչ որ բարի է եւ վաւերական ու զայն կ՛առաջարկէ Եկեղեցւոյ եւ Սրբազան Քահանայապետին, որուն հիման վրայ կ՛առնուին համապատասխան որոշումներ։

Ասոր համար է որ Ֆրանչիսկոս Քահանայապետը Հռոմ կանչեց աշխարհի եպիսկոպոսները որոնք յառաջիկայ հոկտեմբերին պիտի գումարեն 14-րդ սովորական սիւնհոդոսը որուն նիւթն է ''Ընտանիքի կոչումն ու առաքելութիւնը Եկեղեցւոյ եւ ժամանակակից աշխարհի մէջ''։

 

Ֆրանչիսկոս Քահանայապետի խօսքերէն Սիւնհոդոսականութեան մասին։

 

''Սիւնհոդոսական հաւաքները չեն ծառայեր գեղեցիկ եւ ինքնատիպ գաղափարներու շուրջ վիճելու  կամ ալ հասկնալու թէ ո՞վ աւելի խելացի է։ Անոնք կը ծառայեն աւելի լաւ մշակելու եւ պահպանելու Տիրոջ Այգին, համագործակցելու համար Անոր երազին, Անոր սիրոյ ծրագրին իր ժողովուրդին համար'' ըսած էր Ֆրանչիսկոս Սրբազան Քահանայապետը անցեալ 5 հոկտեմբեր 2014-ին, Ընտանիքին նուիրուած արտակարգ սիւնհոդոսի բացումի սուրբ պատարագի ընթացքին արտասանած պատգամին մէջ որուն մէջ ապա յորդորած էր ''աւելի լաւ մշակելու եւ պահպանելու Տիրոջ Այգին հարկ է որ մեր սրտերը մեր մտքերն ու մեր մտածումները պահպանուած ըլլան Յիսուսի Քրիստոսի մէջ, Աստուծոյ խաղաղութիւնը` որ կը գերազանցէ որեւէ իմաստութիւն։ (Ընտանիքի մասին սիւնհոդոսի նիստերու բացման սուրբ պատարագ, 5 հոկտեմբեր 2014)

Մինչ սիւնհոդոսի  եզրափակիչ սուրբ պատարագի ընթացքին արտասանած իր պատգամին մէջ Ֆրանչիսկոս Պապ յայտնած էր ''Սիւնհոդոս կը նշանակէ ''միասին քալել'։ Արդարեւ աշխարհի ամէն վայրերէն Հովիւներ եւ աշխարհականներ Հռոմ բերին իրենց յատուկ եկեղեցիներուն ձայնը, օգնելու համար ժամանակակից ընտանիքները քալելու Աւետարանի ճանապարհին վրայ, հայեացքը ուղղակիօրէն յղելով Յիսուսին։ Մեծ փորձառութիւն մը ապրեցանք, որուն ընդմէջէն ապրուեցաւ սիւնհոդոսականութիւնն ու հաւաքականութիւնը եւ փորձարկեցինք Սուրբ Հոգւոյն զօրութիւնը որ կ՛առաջնորդէ եւ միշտ կը նորոգէ իր Եկեղեցին, որ կանչուած է առանց յապաղումի, խնամելու արիւնոտ վէրքերը եւ վերակենդանացնելու յոյսը` բազմաթիւ այն անյոյս մարդոց մէջ։ (Եզրափակիչ Սուրբ Պատարագ` Ընտանիքի մասին գումարուած արտակարգ սիւնհոդոսին, 18  հոկտեմբեր 2014)։