Францішак нагадаў пра важнасць самакрытыкі

Каб быць міласэрнымі да іншых, трэба мець адвагу бачыць уласныя слабасці, адзначыў папа Францішак 11 верасня 2015 г. падчас ранішняй Эўхарыстыі ў Ватыкане. У сваёй гаміліі Святы Айцец падкрэсліў, што вернікам неабходна навучыцца не асуджаць іншых, каб не стаць крывадушнікамі. Гэта тычыцца абсалютна ўсіх, пачынаючы з Папы, дадаў ён.

Францішак прывёў у прыклад св. Паўла, які ў пасланні да Цімафея, меў адвагу прызнацца, што “быў блюзнерцам, пераследнікам і крыўдзіцелем”. Такі самы сэнс маюць евангельскія словы Езуса пра шчэпку ў воку бліжняга і бервяно ва ўласным. Яны вучаць глядзець на сябе, перш чым асуджаць, перакананы Пантыфік. “Першы крок – гэта судзіць аб самім сябе”, а не адчуваць “сябе суддзёй, які вынімае шчэпкі з вачэй іншых”, дадаў ён. На думку Святога Айца, асобы, якія не глядзяць на сябе, а асуджаюць бліжніх, з’яўляюцца крывадушнікамі. 

Францішак заклікаў вернікаў прасіць у Бога аб ласцы навяртання і спынення ў моманты, калі ўзнікае жаданне падумаць пра “дэфекты іншых” людзей. “Паберажэм каментары аб іншых і пакаментуем саміх сябе. Гэта першы крок на шляху да велікадушнасці, бо асоба, здольная глядзець толькі на шчэпкі ў чужых вачах, сыходзіць да нізасці: нізкай душы, поўнай дробязнасці, поўнай пляткарства”, - лічыць Папа.

На заканчэнне сваёй гаміліі Пантыфік паўтарыў уласныя словы пра тое, што асоба, якая ніколі не казала кепска пра іншых людзей, можа быць неадкладна кананізаванай.