Me 3 shtator, Kisha përkujton Shën Gregorin e Madh, Papë. Ai ishte pranë nevojtarëve, sepse qe bërë një me Hyjin.
Sot me 3 shtator Kisha katolike përkujton festën liturgjike të Shën Gregorit të
Madh, Papë e Doktor i Kishës.
Shën Gregori romak e murg është ndër papët më të mëdhenj në historinë e Kishës. Me
largpamësi profetike, Gregori e kuptoi se një qytetërim i ri po lindte nga takimi
mes trashëgimisë romake dhe popujve të ashtuquajtur “barbarë”, falë forcës së lidhjes
e ngritjes së lartë morale të Krishterimit.
Ishte i madh, sepse i përvujtë, Shën Gregorin e Madh, qe i pari që e quajti papën
‘Shërbëtor i shërbëtorëve të Hyjit”. Jeta e tij, që zgjati nga viti 540 deri në vitin
604, qe e jashtëzakonshme: në moshën 30 vjeçare u bë prefekt i Romës; murg më vonë;
e më pas u zgjodh papë, pa dëshirën e vet. Ishte një papë që bashkoi aftësinë administrative,
të fituar si nëpunës perandorak, me stilin kundrues e asketik të jetës oshënare. Gregori
i Madh shkruante kështu: “Jeta e bariut të shpirtrave duhet të jetë sintezë e drejtpeshuar
e kundrimit dhe e veprimit, e frymëzuar nga dashuria, që prek majat e larta kur përkulet
plot mëshirë mbi shqetësimet e thella të të tjerëve. Aftësia për t’u përkulur para
mjerimit të tjetrit, është masa e forcës së sulmit drejt lartësisë”. (II,5) (Engjëlli
i Tënzot i 3 shtatorit 2006)
Në ndryshim nga perandori bizantin, që mendonte se longobardët s’ishin tjetër, veçse
një turmë me njerëz të pagdhendur e grabitqarë, të cilët duheshin shpartalluar e shfarosur,
Gregori i Madh i shikonte me sytë e bariut të mirë, që dëshiron t’ua kumtonte edhe
atyre Fjalën e Hyjit të shëlbimit, duke lidhur me ta, marrëdhënie vëllazërore.
Njihte thellësisht Shkrimin Shenjt, Biblën, që vijonte ta lexonte me përvujtëri, e
me të njëjtën përvujtëri ua shpjegonte besimtarëve.
“Përvujtëria intelektuale është rregulli kryesor për atë, që kërkon të depërtojë në
realitetet e mbinatyrshme, duke u nisur nga Libri i Shenjtë. Përvujtëria nuk e përjashton
studimin serioz, por është e domosdoshme, në se duam që ky studim të jetë shpirtërisht
i frytshëm, duke i krijuar studiuesit mundësinë të hyjë në thellësi të teksteve. Vetëm
kështu mund të dëgjohet e të perceptohet me të vërtetë zëri i Zotit. Nga ana tjetër,
kur kujtojmë Fjalën e Hyjit, duhet të kemi parasysh se nuk mjafton ta kuptosh, në
se kuptimi i saj nuk të nxit edhe të veprosh”. (Benedikti XVI Audienca e përgjithshme
e 4 qershorit 2008)
Shën Gregori i Madh zhvilloi një veprimtari të dendur baritore e civile, reformoi
muzikën liturgjike e cila, nga emri i tij, u quajt ‘gregoriane’. Pati në qendër të
vëmendjes të varfërit.
“Ishte njeri që qe bërë një me Zotin. Kishte etje të pashuar për praninë e Hyjit,
të cilin e ndjente deri në thelb të shpirtit. E pikërisht për këtë arsye, ishte gjithnjë
pranë njeriut, pranë të gjithë nevojtarëve të kohës së vet. Në këtë kohë tepër të
vështirë, madje të dëshpëruar, diti të sjellë paqe e të japë shpresë. Ky njeri i Hyjit
na tregon se ku mund të gjinden burimet e vërteta të paqes, na mëson prej nga vjen
shpresa e vërtetë, prandaj mund të themi me plot gojën se edhe sot e kësaj dite mbetet
prijës për ne”. (Benedikti XVI Audienca e përgjithshme e 28 majit 2008).
All the contents on this site are copyrighted ©. |