Bartolomeu është njëri nga të Dymbëdhjetë Apostujt, që e ndoqën Jezusin. Dimë se
ishte nga Kana e Galilesë, por nuk e dimë as datën e lindjes e as atë të vdekjes.
Mendohet se vdiq nga gjysma e shekullit I, ndoshta në Siri. Qe Katolikosi i të gjithë
armenëve. Festohet më datën 24 gusht.
“Zoti na befason, duke na bërë ta gjejmë atë që kërkonim, pikërisht atje ku
nuk e prisnim” – këtë u kujtoi Benedikti XVI në audiencën e 4 tetorit 2006
shtegtarëve, të cilëve u paraqiti shembullin e Shën Bartolomeut. Apostulli njihet
edhe me emrin Natanael, që do të thotë “Zoti ka dhënë”. Shën Filipi Apostull e njofton
se kishin gjetur Jezusin, të birin e Jozefit nga Nazareti. Natanaeli i përgjigjet
me një paragjykim: “A mund të dalë gjë e mirë nga Nazareti?”. E Filipi ia kthen: “Eja
e shih”. Prej këndej do kuptuar se në lidhjen tonë me Jezusin nuk duhet të përqendrohemi
vetëm tek fjalët; që ta njohim mirë, kemi nevojë për një përvojë të gjallë: “Dëshmia
e të tjerëve është sigurisht e rëndësishme, sepse si rregull, e gjithë jeta jonë e
krishterë fillon me kumtimin që vjen deri tek ne përmes veprës së një ose disa dëshmitarëve.
Por më pas duhet të jemi ne vetë që hyjmë personalisht në lidhje të ngushtë e të thellë
me Jezusin”.
“Qe një izraelitas i vërtetë, në të cilin nuk ka dredhi”, brohoret Jezusi duke takuar
Natanaelin, i cili i përgjigjet: “Rabbì, ti je Biri i Hyjit! Ti je mbreti i Izraelit!”.
Kemi të bëjmë me pohimin e një feje të pastër, që nxjerr në dritë përmasën e dyfishtë
të Jezusit: “Nuk duhet ta humbasim nga sytë as njërën as tjetrën nga dy përmasat,
sepse po të shpallim vetëm përmasën qiellore të Jezusit, krijohet rreziku ta bëjmë
një qenie qiellore dhe të vagëlluar; e në qoftë se, përkundrazi, pranojmë vetëm praninë
e tij në histori, errësojmë përmasën hyjnore, që e cilëson Krishtin në kuptimin e
mirëfilltë të fjalës”.
Nuk kemi lajme të tjera për Bartolomeun, i cili na mëson se bashkimi me Jezusin mund
të jetohet e të dëshmohet edhe pa kryer vepra të jashtëzakonshme.
All the contents on this site are copyrighted ©. |