Եգիպտոսի նախագահ Ապտել Ֆաթթահ Սիսի երէկ բացումը կատարեց Սուէզի ջրանցքին մէկ ընդլայնուած ճիւղին, որուն վրայ աշխատանքները, նախագահին հրամանով, փոխան նախատեսուած երեք տարուան աւարտեցան մէկ տարիէն:
Բացման արարողութեան ներկայ էին միջազգային անձնաւորութիւններ, որոնց շարքին` Ֆրանսայի նախագահ Ֆրանսուա Հոլլանտ եւ Ռուսիոյ վարչապետ Տմիթրի Մետվետեւ: Բրիտանիոյ պաշտպանութեան նախարար Մայքըլ Ֆալլըն ծրագիրը գովաբանելով զայն նկատեց «արդի հրաշալիք» մը: Բացման առիթով երկրին մէջ ազգային տօն հռչակուած էր:
72 քիլոմեթր երկարութեամբ եւ 24 մեթր խորութեամբ նոր ջրանցքը զուգահեռ է 193 քիլոմեթր հին ջրանցքին եւ նաւերու միաժամանակ անցքը կ՛արտօնէ:
«Էսոշիէյթըտ Փրես» կը հաղորդէ, որ նոր ջրանցքը նկատուած է «պատմական ձեռքբերում» մը, որուն նպատակը Եգիպտոսի տարիներէ ի վեր դժուար կացութեան մէջ գտնուող տնտեսութիւնը խթանելն է:
8,5 միլիառ տոլար արժած նոր ջրանցքին բացումէն առաջ օրական 50 նաւեր կ՛օգտագործէին Կարմիր եւ Միջերկրական ծովերը իրարու միացնող ջրանցքը:
All the contents on this site are copyrighted ©. |