Më 3 gusht kalendari kishtar përkujton shën Lidien. Lidia është
fryti i parë i pjekur nën rrezet e diellit të krishterimit në Evropë, duke qenë e
lindur në Tiatìra, qytet i Azisë. Ishte prozelite hebraike e jetonte në Filipi të
Maqedonisë, ku Shën Pali Apostull, i shoqëruar nga Sila, Timoteo e Luka, pati shkuar
gjatë shtegtimit të tij të dytë misionar, ndërmjet viteve 50 e 53. Shtëpia e Lidies
u bë qendra e parë e bashkësisë të ndjekësve të Krishtit, pra Kisha e parë në Evropë,
në të cilën apostujt takoheshin dhe u jepnin zemër vëllezërve. Ndonëse mungojnë të
dhënat për kultin e Shën Lidies, që kujtohet në Martiriologun Romak, shenjtëria e
saj është e qartë, sepse Lidia qe ndër të parat që iu përgjigj me gjithë zemër hirit
hyjnor.
“Të shtunën – rrëfen Shën Luka në Veprat e Apostujve - dolëm jashtë portës dhe ecëm
gjatë brigjeve të lumit, ku mendohej se do të gjendej një vend për lutje. U ulëm e
filluam t’u flisnim grave, që ishin mbledhur për të na dëgjuar. Njëra nga ato, e quajtur
Lidia, tregtare purpure, pagane nga qyteti i Tiatirës, grua me frikën e Zotit, po
na dëgjonte. Zoti ia hapi zemrën që ta kuptonte çka po thoshte Pali Apostull. Atëherë
Lidia kërkoi të pagëzohej, e bashkë me të u pagëzuan edhe njerëzit e tjerë të familjes,
të cilët nisën t’i prisnin misionarët në shtëpinë e tyre si miq të dashur. Kështu
Lidia u bë prototip dhe simbol i të gjitha grave, që ndezën brenda mureve shtëpiake,
flakën e fesë në Krishtin Jezus.
All the contents on this site are copyrighted ©. |