2015-07-31 09:14:00

Սրբազան արարողութիւն ամենապատիւ և Գերերջանիկ Տէր Գրիգոր Պետրոս Ի.ի գահակալութեան


Զմմառոու դպրեվանքի կայքէջին վրայ կը կարդանք հետեւեալ ծանուցումը

Մեծ ուրախութեամբ կը ծանուցանենք թէ Տանն Կիլիկիոյ Կաթողիկէ Հայոց նորընտիր Կաթողիկոս-Պատրիարքին գահակալութեան-քօղարկութեան սրբազան արարողութիւնը տեղի պիտի ունենայ Զմմառու Վանքին շրջափակին մէջ, Կիրակի 9 Օգոստոս 2015-ին, կէսօրէ ետք ժամը 5-ին: Ամենապատիւ և Գերերջանիկ Տէր Գրիգոր Պետրոս Ի., մասնակցութեամբ Հայ Կաթողիկէ Եպիսկոպոսաց դասուն, Սուրբ և Անմահ Պատարագ պիտի մատուցանէ, որ շարունակուելէ ետք մինչեւ «Զի ողորմած և մարդասէր ես Աստուած», գահակալութեան արարողութիւնը կը սկսի: Կարգերէցը հարցումներ կ'ուղղէ նոր Հայրապետին, որմէ ետք եպիսկոպոսներուն դասը երիցս կ'երգէ «Աստուածային և երկնաւոր շնորհ...կոչէ զԳրիգոր Պետրոս յԵպիսկոպոսութենէ ի Հայրապետութիւն Տանն Կիլիկիոյ»: Յետոյ ամէնքը բազմելով՝ միասին կ'աղօթեն. «Տէր, ընկա՛լ զպաղատանս մեր ամենեցուն ժողովելոցս ի տաճար փառաց սրբութեան անուանդ քոյ և զծառայս քոյ զոր ընտրեցեր, կոչեցեր զնա յառաջնորդութիւն ժողովրդեան քոյ և ի սպաս պաշտման Սուրբ, Կաթողիկէ և Առաքելական Եկեղեցւոյ, լինել վերակացու և քարոզ ճշմարտութեան ուղղափառ հաւատոյ: Ընկա՛լ և շնորհեա սմա զօրութիւնս և շնորհս առաքելականս»: Արարողութեան երկրորդ հանգրուանին՝ տեղի կ'ունենայ քօղարկութիւնը նոր Կաթողիկոսին: Գահերէցը և եպիսկոպոսները կարմիր քօղը նորընտիր հայրապետին գլխուն վրայ կ'իջեցնեն առջեւէն մինչեւ ճակատը, իսկ թիկունքէն մինչեւ ուսանոցը: Ապա նոր Հայրապետին կը յանձնեն կաթողիկոսական գաւազանը: Երգչախումբը երիցս կ'երգէ. «Առ բազում ամս, Տէր», «Իսբոլա էթի, Տեսբօթա» և ապա «Հրաշափառ» շարականը: Գահակալութեան արարողութեան աւարտին՝ քօղը կը վերցուի Հայրապետին վրայէն: Այնուհետեւ Ս. Պատարագի մատուցումը կը շարունակուի մինչեւ աւարտը:

Սրբազան երգեցողութիւնը պիտի կատարէ «Կռունկ» Պատրիարքական երգչախումբը, ղեկավառութեամբ Դոկտ. Եդուարդ Թորիկեանի:
Սրբազան արարողութեան ներկայ պիտի գտնուին Հռոմի Ս. Աթոռի Արեւելեան Եկեղեցիներու Ժողովին ներկայացուցիչներ, Լիբանանի Պապական Նուիրակը, Հայ և օտարազգի բարձրաստիճան Հոգեւորականներ, Առաջնորդներ, Զմմառու Պատրիարքական Կղերի Միաբանութեան վարչական Հայրեր, Միաբան Հայրեր, Համայնքային ներկայացուցիչներ, Պետական անձնաւորութիւններ, Հայ Կուսակցական Միութիւններու ներկայացուցիչներ: Այսու՝ կը հրաւիրենք մեր հաւատացեալ ժողովուրդը մասնակցելու սոյն հոգեպարար արարողութեան և ընդունելու Գահակալ Հայրապետին անդրանիկ օրհնութիւնը: 








All the contents on this site are copyrighted ©.