Святы Пасад выйшаў са складу праваабарончага аб’яднання

 

Апостальская Сталіца больш не з’яўляецца членам міжрэлігійнага аб’яднання супраць гандлю людзьмі “Global Freedom Network”, стварэнне якога было ініцыявана аўстралійскім бізнесменам Эндру Форэстам. Дакладныя прычыны выхаду Святога Пасаду з арганізацыі не павядамляюцца, але гэта было зроблена, каб пазбегнуць “інструменталізацыі” з боку прадпрымальніка, заўважыў канцлер Папскай акадэміі навук біскуп Марчэла Санчэс Саронда. “Бізнесмен мае поўнае права зарабляць грошы, але не выкарыстроўваючы Папу”, - дадаў ён.

“Global Freedom Network” пачала сваю дзейнасць 17 сакавіка 2014 г. з мэтай аб’яднання рэлігійных супольнасцяў супраць феномену сучаснага рабства, прадстаўленага прастытуцыяй, прымусовай працай, гандлем органамі. Адпаведнае пагадненне было падпісана ў Ватыкане.

Праз некалькі месяцаў, у рамках дзейнасці аб’яднання, у прысутнасці папы Францішка ў Ватыкане, прадстаўнікамі розных рэлігій – хрысціянства, іслама, юдаізма, індуізма, была падпісана супольная дэкларацыя.