Ngushëllimet e Papës për vdekjen e kardinalit William Baum

Papa shpreh ngushëllimet e tij për vdekjen e kardinalit amerikan William Wakefield Baum: ishte 88 vjeç. Në një telegram drejtuar kryeipeshkvit të Washingtonit, kardinalit Donald Wuerl, Françesku kujton me mirënjohje angazhimin ipeshkvnor të të ndjerit në dioqezën e Springfield-Cape Girardeau e të Washington-it. Më pas, shërbimin e gjatë ndaj Selisë së Shenjtë, në krye të Kongregatës për Edukimin Katolik si dhe të Pendestarisë Apostolike.

I lindur në Dallas, më 1926, u shugurua meshar 24 vjeç. Më 1970 Pali VI e emëroi ipeshkëv të Springfield-Cape Girardeau; më 1976, e krijoi kardinal.

Pas vdekjes së kardinalit Baum, Kolegji kardinalor numëron 220 kardinaj, nga të cilët, 120 me të drejtë zgjedhore, 100, mbi moshën 80 vjeç.