Do të jenë qytetet ato, që do ta nxisin botën të bëjë kthesë ekologjike. Kështu tha mbrëmë Papa Françesku, në takimin me 70 kryetarë bashkish, ardhur në Vatikan nga e gjithë bota për një seminar mbi skllavëritë e reja dhe mbi ndikimin e ndryshimeve të klimës, organizuar nga Akademia Papnore e Shkencave dhe ajo e Shkencave Shoqërore. Në përfundim të takimit, Ati i Shenjtë dhe kryebashkiakët nënshkruan një deklaratë të përbashkët.
Papa shprehu optimizmin e tij për mbledhjen e OKB-së mbi ndryshimet e klimës, që do të zhvillohet në Paris, në dhjetor. Kryebashkiakëve u foli në spanjisht, pa letër, duke u kërkuar jo vetëm atyre, por edhe Kombeve të Bashkuara, të interesohen më shumë për fenomenin e trafikut e të shfrytëzimit të njerëzve, që ndihmohet edhe nga ndryshimet e klimës: “I lutem Zotit të bëhemi të vetëdijshëm për problemin e planetit, të cilin po e shkatërrojmë ne vetë, duke mos pasur ndërgjegjen ekologjike, që na u dha në zanafillë”.
Më pas, nxiti kryebashkiakët, që në bashkëpunim konkret me Kishën, të bëjnë ç’është e mundur për ndërgjegjësimin e popullsive: “Selia e Shenjtë, ose filan vend apo tjetri, mund të mbajnë fjalime të bukura në Kombet e Bashkuara, por nëse puna nuk fillon nga periferitë drejt qendrës, nuk ka efekt”.
Të kujdesesh për ambientin, theksoi Papa, nuk do të thotë thjesht të mos e prishësh atë, pra të duash gjelbërimin e natyrën, por të luftosh për “ekologjinë njerëzore”. Siç e shpjegon edhe në Enciklikën “Lëvduar qofsh”, me termin “ekologji njerëzore”, Ati i Shenjtë nënkupton se njeriu nuk mund të shkëputet nga gjithçka e rrethon e se kur ambienti keqtrajtohet, është i pari që i vuan pasojat. “Enciklika – përsëriti Françesku – nuk është enciklikë ‘e gjelbër’, por enciklikë shoqërore”. Kur nuk kemi kujdes për ambientin, vijoi Papa, qytetet rriten tej mase e kështu, edhe getot e varfërisë e të mjerimit në to, sepse njerëzit e zhvendosur nga zonat e fshatit nuk gjejnë më punë në qytet.
Ati i Shenjtë Bergoglio denoncoi sërish “idhujtarinë e teknokracisë”, pasoja më e rëndë e së cilës është humbja e punës; shprehu shqetësimin e tij për përqindjen e lartë të papunësisë ndër të rinjtë nën 25 vjeç, që në disa vende evropiane arrin nga 40 deri në 50%. “Ç’i mbetet kësaj rinie – komentoi – përveçse varësisë nga gjëra që u prishin jetën, përveçse vetëvrasjes apo kërkimit të horizonteve të reja, përmes emigracionit”.
E Papa hyri edhe në detaje. Foli për sëmundjet e rralla, shkaktuar nga plehrat kimike, nga teknicizmi i tepruar; denoncoi shkretëtirëzimin, që godet mushkëritë e gjelbërta të botës, viktima të shpyllëzimit; shpjegoi lidhjen ndërmjet emigracionit, mungesës së punës e trafikut të njerëzve, gjithnjë e më të detyruar të punojnë pa kontratë, pa një pagesë të mjaftueshme për të mbijetuar, duke shtuar kështu, radhët e keqbërësve si në qytetet e mëdha, ashtu edhe në të voglat.
All the contents on this site are copyrighted ©. |