Ֆրանչիսկոս Պապի այցելութիւնը Քիթօ քաղաքի Iglesia de la Compania անուան եկեղեցի

(Ռատիօ Վատիկան) Երեքշաբթի, 7 յուլիսին, տեղական ժամով 19,15-ին (Հռոմի ժամով 2,15),  Ֆրանչիսկոս Սրբազան Քահանայապետը այցելեց Քիթօ քաղաքի  մէջ գտնուող Յիսուսեան Միաբանութեան պատկանող անուանի  ''La Iglesia de la Compania'' տաճարը։

Եկեղեցւոյ մուտքին Նորին Սրբութիւնը  դիմաւորուեցաւ Յիսուսեան միաբանութեան մի քանի անդամներու կողմէ, որմէ ետք Քահանայապետը պահ մը ամփոփուեցաւ եկեղեցւոյ  Տառապանքի Տիրամօր հրաշագործ պատկերին դիմաց։

Iglesia de la Compania եկեղեցին

Յիսուսեան միաբանութեան  առաջին կղերական քահանաները  Քիթօ քաղաք ժամանած են 19 Յուլիս 1586-ին։ Հայր Նիքոլաս Տուրան՝ Հռոմի  Յիսուսեան միաբանութեան դպրեվանքին առաջին տեսուչ, Քիթօ քաղաք մեկնած է 1602-ին իր հետ տանելով Iglesia de la Compania  եկեղեցւոյ կառուցման  ծրագիրը, որ  պատրաստուած  էր Հռոմի Սուրբ Իգնատիոս Լոյոլայի եկեղեցւոյ միեւնոյն ճարտարապետին կողմէ։

Եկեղեցւոյ կառուցման առաջին քարը զետեղուած է 1605-ին եւ աշխատանքները վերջ գտած են 1765-ին.։

Եկեղեցւոյ զանգակատունը եղած  է Քիթօ քաղաքի ամենէն բարձր կառոյցը ՝ մինչեւ 1859-ին ՝ երբ զօրաւոր  երկրաշարժ մը  գրեթէ ամբողջովին կործանած է եկեղեցին։

Նշենք, թէ եկեղեցին 1987-ին, դարձեալ թիրախ  դարձած է երկրաշարժի հարուածին, եւ որուն վերանորոգման գործերը աւարտած են 2005-ին։

Եկեղեցւոյ մէջ կը գտնուին զանազան ոսկեզօծ եւ շքեղ զարդարուած խորաններ, շրջապատուած շքեղ արձաններով ասոնց շարքին են  Քիթօ քաղաքի  աւետարանիչներու  եւ քրիստոնեայ առաջին հասարակութիւններու հիմնադիրներու  արձանները, ինչպէս՝ Սուրբ Իգնատիոս Լոյոլան , Սուրբ Ֆրանչիսկոս Ասիզիին եւ այլն։

Արժանի է նշել  նաեւ եկեղեցւոյ մէջ գտնուող Inferno ՝՝Դժոխք՝՝ կոչուող հռչակաւոր եւ անուանի պատկերը։

Տաճարը նկատուած է  Սպանական  Պարոք արուեստի  գոհար մը եւ  արձանագրուած է Ունէսքոյի մարդկային ժառանգութեան ցուցակին մէջ։