Թրքական «Միլլիյէթ» օրաթերթի կայքը կը հաղորդէ, որ Ատանայի Ֆեքէ շրջանին մէջ գտնուող Սեւ եկեղեցւոյ եւ բերդի վերակառուցման աշխատանքները աւարտական հանգրուանին մէջ կը գտնուին:
Կը նախատեսուի, որ վերակառուցման աշխատանքները աւարտին մինչեւ տարեվերջ:
Շրջանի թաղապետ Հասան Կեզեր կը նշէ, որ արդէն երկու տարի շարունակուող շինարարութեան աւարտէն ետք եկեղեցին ու բերդը զբօսաշրջութեան համար կարեւոր վայրեր պիտի դառնան` օգուտ բերելով թաղամասին:
«Վերջին շրջանին Թուրքիոյ տարբեր անկիւններէն եւ դուրսէն բազմաթիւ զբօսաշրջիկներ կու գան եկեղեցին եւ բերդը տեսնելու: Եթէ զանոնք այստեղ հիւրընկալելու համար տեղեր ստեղծուին, աւելի շատ զբօսաշրջիկներ պիտի գան», կ՛ըսէ ան:
Ֆեքէ բերդի վերակառուցման աշխատանքներուն մէջ ներգրաւուած հնագէտ Ատեմ Եըլտըզ կը նշէ, որ բերդը կառուցուած է հազարական թուականներուն եւ կը գտնուի Կիլիկիոյ տարածքին մէջ:
«Կառոյցը երկյարկանի է: Այստեղ մեծագոյն դժուարութիւններէն մէկը այն է, որ այցելուները մնալու տեղ չունին: Բերդի կողքին նոյն վայրի 14 այլ եկեղեցիներուն հետ կապ ունեցած Սեւ եկեղեցւոյ վերակառուցումը ընթացքի մէջ է: Պիտի վերակառուցուին նաեւ այլ բերդեր», ըսած է ան:
All the contents on this site are copyrighted ©. |