Մինչեւ 1100 սփիւռքահայ երիտասարդ այս տարի կը մասնակցի «Արի տուն 2015» հայրենաճանաչութեան ծրագիրին: «Արմէնփրես»-ի հաղորդմամբ, Յունիս 15-ին, աւանդական դարձած թիւով 7-րդ ծրագրի մեկնարկին այս մասին ըսած է ՀՀ սփիւռքի նախարար Հրանոյշ Յակոբեանը:
Այս տարի ծրագիրը կ՛իրականացուի Յուլիս 14-էն Օգոստոս 29:
«Ծրագիրը շատ կարեւոր է նրանով, որ հազարաւոր երիտասարդներ առաջին անգամ գալիս են Հայաստան, որի մասին միայն լսել էին իրենց ուսուցիչներից, բարեկամներից: Ամփոփելով 7 տարին` կարող եմ ասել, որ տասնեակ երիտասարդներ ընտանիքներ են կազմել, իրենց ուսումը շարունակել են հայկական բուհերում (համալսարան-ԵՌԳ.), շատերը ընտանիքներին ստիպել են գալ Հայաստան եւ հանգիստն անցկացնել հայրենիքում: Այս տարի ծրագիրը հիմնականում իրականացուելու է սիրիահայ երեխաների համար, որպէսզի մեր պատանիները ռումբերի փոխարէն տեսնեն մեր սիրելի հայրենիքը»,- ըսած է Հրանոյշ Յակոբեան:
Այս տարի մեկնարկած ծրագրի առաջին փուլին կը մասնակցին 58 երիտասարդներ, որոնցմէ 38-ը` Հայաստան տեղափոխուած սուրիահայեր են, իսկ 20-ը` 13-18 տարեկան պատանիներ ու աղջիկներ Ռուսիայէն, Պելառուսիայէն, Թուրքմէնիայէն եւ ԱՄՆ-էն:
Սփիւռքի նախարարը առանձնայատուկ շնորհակալութիւն յայտնեց ընտանիքներու այն մայրերուն, որոնք իրենց տան դռները կը բանան սփիւռքի հայ երեխաներուն` իրենց տունը ընդունելու եւ պահելու համար: Ծրագրի ամենաերիտասարդ մասնակից 13-ամեայ Ռայմոնդ Նազարեանը ծնողներուն հետ Հայաստանէն մեկնած էր երկու ամսականին եւ, ապրելով Մոկսուա, այսօր բաւական կաշկանդուած կը խօսէր հայերէն: «Երէք ընկերներով եկել ենք մասնակցելու «Արի տուն» ծրագրին, որպէսզի տեսնենք Հայաստանի գեղեցիկ լեռները: Այս տարիների ընթացքում ընտանիքիս հետ շատ անգամ եմ եկել Հայաստան, սակայն հիմա կը կարողանամ տեսնել երկրի մնացած գեղեցիկ վայրերը», - ըսած է Ռայմոնդ Նազարեանը:
Ծրագիրը կ’իրականացուի 8 փուլով, որուն ծիրէն ներս տեղի պիտի ունենան այցելութիւններ թանգարաններ, Հայաստանի բազմազան պատմամշակութային կոթողներ, ամենօրեայ հայոց լեզուի դասեր: Այս տարի «Արի տուն» ծրագրի ծիրէն ներս կը կազմակերպուի նաեւ 4-օրեայ ամառնային ճամբար Ծաղկաձորի մէջ, որ կը ներառի հայրենագիտութեան, ազգային երգի ու պարի դասեր:
Անցեալ տարուան ծրագրին կարեւոր էր Տիարպեքիրէն 50 հոգինոց երիտասարդներու այցելութեամբ: Իսկ այս տարի կը սպասուի Տերսիմի իսլամացած հայերու ընտանիքներէն 50 երիտասարդներու մասնակցութիւնը «Արի տուն» ծրագիրին:
«Արի տուն» ծրագիրը մեկնարկած է 2009-ին, երբ աշխարհի 14 երկիրներէ Հայաստան այցելած են 14-25 տարեկան 317 երիտասարդ: Իսկ 2014-ի ծրագիրին Հայաստան այցելեցին 1071 սփիւռքահայ, ինչպէս նաեւ 200` հայաստանաբնակ երեխաներ:
All the contents on this site are copyrighted ©. |