(Ռատիօ Վատիկան) Արեւելեան եկեղեցիներու օգնութիւն ''ՌՈԱՔՕ'' բարեսիրական հաստատութիւնը, Վատիկանի մէջ կը գումարէ իր 88-րդ լիանիստ հաւաքը` 15-էն 17 յունիս 2015-ին։
Հաւաքը սկիզբ կ՛առնէ` երկուշաբթի 15 յունիսին, Ֆրանչիսկոս Պապին ՌՈԱՔՕ-ի ներկայացուցիչներուն շնորհած ունկնդրութեամբ։
Նիստերու ընթացքին ժողովականները պիտի քննարկեն` Սուրիոյ, Իրաքի, Հայաստանի, Եթովպիայի, Էրիթրէայի եւ Սուրբ Երկրի եկեղեցիներուն հայող ֆինանսաւորումներու հարցեր։
Նիստերու ընթացքին ելոյթ կ՛ունենան ի մէջ այլոց` Սուրբ Աթոռի Պետութիւններու հետ յարաբերութեանց քարտուղար` Գերապայծառ Փոլ Կալլակէր, Դամասկոսի մօտ առաքելական նուիրակ` գերապայծառ Զէնարի, ''Քոր Ունում'' բարեսիրական հաստատութեան քարտուղար` գերապայծառ Ճամփիեթրօ Թոզօ։
Երեքշաբթի` 16 յունիսին Կարդինալ Լէոնարտօ Սանտրի` Արեւելեան Եկեղեցիներու Համաժողովի կառավարիչը կը նախագահէ սուրբ պատարագի արարողութիւնը որուն ընթացքին, յատուկ աղօթք պիտի կատարուի Միջին Արեւելքի եւ Ուկրանիոյ խաղաղութեան ի նպաստ, ինչպէս նաեւ ՌՈԱՔՕ-ի բարերարներու դիտաւորութեան։
Հուսկ` Մեծ Եղեռնի 100-րդ տարելիցին առթիւ, յատուկ նիստ մը պիտի յատկացուի Արեւելեան Եւրոպայի Հայ Կաթողիկէ եկեղեցւոյ, որուն ընթացքին ելոյթ պիտի ունենայ Հայաստանի, Վրաստանի, Ռուսիոյ եւ Արեւելեան Եւրոպայի հայ կաթողիկէներու առաջնորդը` Արհ Ռաֆայէլ Արք. Մինասեանը։ Այլ նիստեր պիտի յատկացուին նաեւ Եթովպիայի եւ Էրիթրէայի եկեղեցիներուն ու պիտի քննարկուի Սուրբ Երկրի եկեղեցական կառոյցներու իրավիճակը։
ՌՈԱՔՕ-ի 88-րդ լիանիստ ժողովը, որուն նպատակն է ի յայտ դնել աւետարանութեան ու բարեգործութեան կարեւորութիւնը վերջ կը գտնէ 17 յունիսին։
Յայտնենք թէ ՌՈԱՔՕ-ն կը համախմբէ աշխարհի տարբեր երկիրներու մէջ գործող բարեսիրական հաստատութիւններ, որոնք յանձնառու են աջակցելու եւ ֆինանսական օժանդակութիւն յատկացնելու Արեւելեան Եկեղեցիներու տարբեր եւ զանազան ասպարէզներու հայող ձեռնարկներուն։
All the contents on this site are copyrighted ©. |