Titulli i Enciklikës së Papës: “Lëvduar qofsh, mbi kujdesin për shtëpinë e përbashkët”

“Lëvduar qofsh - mbi kujdesin për shtëpinë e përbashkët”. Ky është titulli i Enciklikës së re të Papës Françesku, kushtuar temave ambientale, që do të paraqitet më 18 qershor, në orën 11.00, në Sallën e re të Sinodit në Vatikan.

         Në një komunikatë, saktësohet se dokumenti do t’u paraqitet gazetarëve nga kryetari i Këshillit Papnor për Drejtësinë e Paqen, kardinali Peter Kodwo Appiah Turkson, nga Mitropoliti ortodoks i Pergamos, John Zizioulas, që përfaqëson Patrikanën Ekumenike dhe nga themeluesi e drejtori i Institutit të Potsdamit për Ndikimin e Klimës, prof. John Schellnhuber.

         Teksti i Enciklikës do të jetë në dispozicion në gjuhën italiane, franceze, angleze, gjermane, spanjolle, portugeze (si në format të shkruar, ashtu edhe në atë digjital). U komunikojmë dëgjuesve, sidomos gazetarëve, se po atë ditë, do të jetë në dispozicion të tyre, në faqen tonë të internetit dhe në Facebook, një sintezë të Enciklikës në gjuhën shqipe.