Համահայկական ամառնային 6-րդ խաղերուն ջահը հասաւ Քարվաճառ

Մայիս 8-ին Շուշիի Ղազանչեցոց եկեղեցւոյ մէջ վառած ջահը Յունիս 8-ին հասաւ Քարավաճառ: Քարվաճառի Չօփռլու կոչուող տարածքին մէջ` «Թանկ» յուշարձանի տարածքին, հայոց բերդաքաղաքէն  բերուած ջահը յաջորդ ջահակիրին` ապագայ զինուոր Լեւոն Պօղոսեանին, փոխանցեց  սամպոյի աշխարհի ախոյեան Մաւրիկ Նասիբեանը:  Այս մասին «Հայերն այսօր»-ին կը տեղեկացնէ Աննա Վարդանեանը:

Ջահակիրը եւ տարածքը պատահաբար չէր ընտրուած:

«Այստեղ հաւաքուելով մենք եւս մէկ անգամ հաստատում ենք, որ մենք տէրն ենք մեր յաղթանակների: Համահայկական խաղերը զուտ սպորտային (մարզական-ԵՌԳ.) միջոցառում չեն, դրանք Հայաստան, Արցախ, Սփիւռք կապի լաւագոյն դրսեւորումներից մէկն են: Հէնց այս տարածքում ջահի փոխանցմամբ մենք ասում ենք, որ բանակը միշտ հասարակութեան հետ է եւ ունի փայլուն ապագայ»,- ըսած է ՊՆ 2-րդ բանակային ջոկատի հրամանատար, զօրավար-գնդապետ Պօղոս Պօղոսեանը:

Լեւոնը,  ընդունելով ջահը, յստակ կը գիտակցի, թէ ինչ յատկանիշներով պէտք է օժտուած ըլլայ ջահակիրը: «Ջահակիրը պէտք է ըլլայ հայրենասէր ու առոյգ»,-կ՛ըսէ զինուորը ու առանց վայրկեան մը իսկ կանգ առնելու կը վազէ դէպի Վարդենիս տանող մայրուղիով:

Համահայկական ամառնային 6-րդ խաղերու ջահի յաջորդ կանգառը Վարդենիսն  է:

Համահայկական ամառնային 6-րդ խաղերը տեղի պիտի ունենան Օգոստոս 2-էն 13: Մրցումներ պիտի իրականացուին նաեւ Լեռնային Ղարաբաղի մէջ: Արցախցի  մարզիկները վստահ են` խաղերուն պարտուողներ պիտի չըլլան, կարեւորը մասնակցութիւնն ու միասնութիւնն է: Իսկ գլխաւոր յաղթանակը արդէն տարած են Արցախեան հերոսամարտին: