Սուրբ Պատարագ և Թափօր Սիրտ Յիսուսի նուիրուած Յունիս ամսուայ առթիւ

Կիրակի 7 Յունիս 2015-ին, կէսօրէ ետք ժամը 6-ին, Պուրճ Համուտի Հայ Կաթողիկէ Ս. Փրկիչ եկեղեցւոյ ժողովրդապետութեան նախաձեռնութեամբ, Սիրտ Յիսուսի նուիրուած Յունիս ամսուայ առթիւ, Սուրբ Փրկիչ եկեղեցւոյ մէջ պատարագեց ու քարոզեց Պէյրութի Թեմի Պատրիարքական Ընդհանուր Փոխանորդ և Զմմառու վանքի Մեծաւոր՝ Հ. Գաբրիէլ Թ.Ծ.Վրդ. Մուրատեան: Սուրբ և Անմահ պատարագին ներկայ գտնուեցան Արհիապատիւ եպիսկոպոսներ, գերյարգելի և գերապատիւ վարդապետներ, Զմմառու «Ս. Միքայէլ և Երանելի Մալոյեան» դպրեվանքի նորընծաներ, ինչպէս նաեւ պաշտօնական և պետական անձնաւորութիւններ, Ս. Փրկիչ եկեղեցւոյ զանազան միութիւններ, Ս. Մեսրոպի սկաուտներ, Ս. Գրիգոր Լուսաւորիչ սկաուտները, ՀԿՄ Պատանեկան շեփորախումբ և հաւատացեալ ժողովուրդի հոծ բազմութիւն: Սրբազան երգեցողութիւնը կատարուեցաւ Ս. Փրկիչ եկեղեցւոյ «Արծիւեան» երգչախումբի կողմէ, ղեկավարութեամբ Մաէսթրօ Տիար Մանուէլ Քէշիշեանի: Պատարագիչ Հայրը իր քարոզին մէջ անդրադառնալով Սիրտ Յիսուսի խորհուրդին, շեշտը դրաւ քրիստոնէական վարդապետութեան վրայ և ըսաւ. «Քրիստոսի կեանքը սիրոյ և բարութեան օրինակ է, հակառակ մեր կեանքի դժուարութիւններուն, պէտք է հետեւինք Քրիստոսի օրինակին և հեռանանք չարէն և անոր ամէնօրեայ փորձութենէն»: Պատարագի աւարտին տեղի ունեցաւ Ս. Հաղորդութեան թափօր Պուրճ Համուտի հայահոծ թաղամասերուն մէջ, աղօթքով, երգեցողութեամբ և ՀԿՄ շեփորախումբի մասնակցութեամբ: Օրուան այս հոգեպարար հանդիսութիւնը իր աւարտին հասաւ Ս. Հաղորդութեան օրհնութեամբ: