Յունիս 3-ին` Չեխիա կատարած պաշտօնական այցի վերջին օրը, Պրահայի արքեպիսկոպոսարանին մէջ վարչապետ Յովիկ Աբրահամեան հանդիպած է Պրահայի արքեպիսկոպոս Կարդինալ Տոմինիք Տուքայի հետ:
Ինչպէս կը յայտնեն ՀՀ Կառավարութենէն` շնորհակալութիւն յայտնելով ջերմ ընդունելութեան համար` Յովիկ Աբրահամեան բարձր գնահատած է Հայաստանի եւ Չեխիոյ միջեւ բարեկամական յարաբերութիւններու խորացումը եւ այս ծիրէն ներս կարեւորած է Հայ առաքելական եկեղեցւոյ եւ չեխ կաթողիկէ եկեղեցւոյ համագործակցութիւնը:
Վարչապետը շնորհակալութիւն յայտնած է, որ չեխ Կաթողիկէ եկեղեցին Պրահայի կենտրոնին մէջ գտնուող Սուրբ Եիլիի տաճարը կը տրամադրէ հայկական ժամերգութիւններու եւ պատարագներու իրականացման համար եւ իր երախտագիտութիւնը յայտնած է Կարդինալին Չեխիոյ մէջ Հայոց ցեղասպանութեան ճանաչման գործընթացին եւ Ցեղասպանութեան 100–րդ տարելիցի առիթով կազմակերպուած ձեռնարկներուն ցուցաբերած անոր աջակցութեան համար:
Ողջունելով Յովիկ Աբրահամեանին` Կարդինալ Տուքան բարձր գնահատած է Հայաստանի վարչապետին պաշտօնական այցը Չեխիոյ Հանրապետութիւն եւ կարեւորած է զայն հայ-չեխական բարեկամութեան ամրապնդման եւ խորացման պարունակին մէջ: Անոր խօսքով` մեծ պատիւ է ընդունիլ քրիստոնէութիւնը որպէս պետական կրօն առաջինը ընդունած եւ աշխարհի ամենահին ազգերէն մէկուն ներկայացուցիչները եւ անգնահատելի համարել հայ ժողովուրդի ներդրումը համաշխարհային հոգեւոր եւ մշակութային ժառանգութեան մէջ:
Հանդիպումի ընթացքին կողմերը քննարկած են այլ հարցեր եւս, անդրադարձած են տարածաշրջանային խնդիրներուն:
All the contents on this site are copyrighted ©. |