Հայ կաթողիկէ Մեսրոպեան բարձրագոյն վարժարանի աշակերտներ Նանօր Արնէլեան, Ճիօ Գալուստ եւ Կի Գալուստ պատուաբեր տիտղոսներով վերադարձան Լիբանանի ճատրակի անհատական ախոյեանութեան խաղերէն, որոնք երկարեցան ամբողջ չորս օրերու վրայ՝ 9-10 եւ 16-17 Մայիս 2015-ին:
Մեսրոպեանական մասնակիցներէն ամենաբարձր ցուցանիշը հաստատեց Նանօր Արնէլեան: Առաւելագոյնը 6 կէտերէն 5.5 կէտ շահելով, Նանօր արձանագրեց բոլորին կողմէ սպասուած յաջողութիւնը եւ տիրացաւ Լիբանանի աղջկանց ճատրակի ախոյեանի տիտղոսին: Ճիօ եւ Կի Գալուստ եղբայրները, իրենց հերթին, ցուցաբերեցին հնարամիտ խաղ եւ երկուքն ալ տարիքային իրենց խումբերուն մէջ նուաճեցին Լիբանանի ճատրակի ախոյեանութեան պրոնզէ մետալները: Մրցաշարքին մասնակցեցաւ նաեւ Մեսրոպեանի աշակերտ Կարօ Գալֆայեան:
Ինչպէս նախապէս, այս անգամ ալ Մեսրոպեան վարժարանի տնօրէն պրն. Կրէկուար Գալուստ ամբողջ աշակերտութեան առջեւ շնորհաւորեց ճատրակի պատանի վարպետները եւ գնահատեց անոնց աշխատանքը՝ մտաւոր ունակութիւններ զարգացնող այս մարզաձեւին մէջ:
Մեսրոպեանի աշակերտները անցած տարեշրջանին մասնակցեցան բազմաթիւ մրցաշարքերու եւ միշտ ալ յայտնուեցան մետալակիրներու դիրքերուն վրայ՝ անհատական թէ խմբային խաղերուն մէջ: Մեսրոպեանի ճատրակի հաւաքականը 2014-2015 տարեշրջանին երրորդ հանդիսացաւ Լիբանանի դպրոցներու ճատրակի ախոյեանութեան մրցումներուն: Մեր աշակերտներու յաջողութեան մեծապէս նպաստեցին անոնց ծնողներուն եւ մարզող ուսուցիչին՝ պրն. Էլի Հուլիշեանի քաջալերանքն ու հոգածութիւնը:
ՏԵՂԵԿԱՏՈՒԱԿԱՆ ԳՐԱՍԵՆԵԱԿ
ՀԱՅ ԿԱԹՈՂԻԿԷ ՄԵՍՐՈՊԵԱՆ ԲԱՐՁՐԱԳՈՅՆ ՎԱՐԺԱՐԱՆԻ
All the contents on this site are copyrighted ©. |