Папа да бацькоў: не ўцякайце ад выхавання сваіх дзяцей

Бацькі не павінны ўхіляцца ад працэсу выхавання ўласных дзяцей, а разведзеныя не могуць выкарыстоўваць іх у якасці “закладнікаў”, адзначыў папа Францішак 20 мая 2015 г. у Ватыкане падчас агульнай аўдыенцыі. Сваю катэхезу ён прысвяціў натуральнаму пакліканню сям’і да выхавання дзяцей і, у першую чаргу, адзначыў, што гэты працэс павінен быць мудрым і разважлівым.

Папа нагадаў словы апостала Паўла: “Дзеці, будзьце паслухмянымі бацькам ва ўсім, бо гэта падабаецца Богу. Бацькі, не раздражняйце вашых дзяцей, каб яны не падалі духам” (Кал 3,20-21). Ён заклікаў не ставіць перад дзецьмі невыканальных заданняў, каб яны не апускалі рукі, але суправаджаць і падтрымлівасць іх. Каб “дзеці ўзрасталі ў адказнасці за сябе і іншых”, неабходна мудрасць і вялікая раўнавага, перакананы Святы Айцец.

Бацькам складана выхоўваць дзяцей, калі бачаць іх толькі па вечарах, калі вяртаюцца з працы стомленыя. Гэта яшчэ складаней для бацькоў, якія не жывуць разам. У такіх сітуацыях здараецца, што муж ці жонка бяруць дзяцей у “закладнікі” – “тата кажа кепска пра маму, а мама – пра тату”. Гэта вельмі шкодзіць дзіцяці, заўважыў Пантыфік.

“Я кажу вам, разведзеным сужэнствам: ніколі, ніколі не бярыце дзяцей у закладнікі! Вам, разведзеным, з-за шматлікіх цяжкасцяў і прычын. Жыццё вам дало гэта выпрабаванне: але дзеці не павінны быць тымі, хто нясе цяжар гэтага разводу, дзеці не павінны выкарыстоўвацца ў якасці закладнікаў супраць другога сужонка. Дзеці павінны развівацца, адчуваючы, як мама добра кажа пра тату, нават калі яны не разам, і тата кажа добра пра маму. Для сужэнстваў, якія разышліся, гэта вельмі важна і вельмі скаладана”, - сказаў Святы Айцец.

Францішак звярнуў увагу на праблему дабраахвотнага ўцякання бацькоў ад выхавання дзяцей і аддання гэтага месца рознага кшталту “экспертам”, якія прэтэндуюць нават на выхаванне у самай далікатнай сферы.

“Аб эмацыйным жыцці, аб асобе і развіцці, аб правах і абавязках так званыя “эксперты” ведаюць усё: мэты, задачы, тэхнікі. А бацькі вымушаны толькі слухаць, вучыцца і падпарадкоўвацца. Пазбаўленыя сваёй ролі, яны часта становяцца баязлівымі ў адносінах да сваіх дзяцей, аж да такой ступені, што не папраўляюць іх ніколі. Намагаюцца заўсёды даверыць іх “экспертам” таксама ў самых далікатных і асабістых аспектах жыцця, а самі адыходзяць у бок. Так бацькі рызыкуюць самаізалявацца з жыцця ўласных дзяцей. І гэта небяспечна!”, - сказаў Папа.

Францішак распавёў гісторыю са свайго дзяцінства. Калі ён вучыўся ў пачатковай школе, аднойчы абразіў настаўніцу. Тая выклікала ў школу яго маці. Пасля размовы маці патлумачыла сыну, што так паводзіць сябе нельга. Ён папрасіў прабачэння ў настаўніцы і быў шчаслівы, што “гісторыя так добра скончылася”. “Але гэта была толькі першая глава! Калі я вярнуўся дамоў, пачалася другая”, - сказаў Папа, даючы зразумець, што быў наказаны. Святы Айцец звярнуў увагу на важнасць супрацоўніцтва паміж сям’ёй і адукацыйнымі структурамі. Без сумневу, некаторыя мадэлі мінулага маюць свае недахопы; праўда і тое, што бацькі могуць рабіць пэўныя памылкі, сказаў ён.

Папа нагадаў, што хрысціянскія супольнасці пакліканы падтрымліваць сем’і ў іх выхаваўчай місіі і дадаў, што сам Езус прайшоў праз сямейнае выхаванне. Францішак адзначыў існаванне шматлікіх узорных хрысціянскіх сем’яў і вялікую сацыяльную ролю сямейнага выхавання, што з’яўляецца асновай гуманізма.