Papa Françesku në katekizmin e audiencës së përgjithshme, mbajtur paradite në Sheshin
e Shën Pjetrit në Vatikan, foli mbi tiparet themelore të familjes, me fjalë tjera,
foli mbi thirrjen e saj të natyrshme që ka në edukimin e fëmijëve, që këta të rriten
me një ndërgjegjësim ndaj vetvetes e ndaj të tjerëve . “Sot, sipas Papës, edukimi
është i vështirë për prindërit që i shohin e takojnë fëmijët vetëm në mbrëmje, kur
kthehen të lodhur në shtëpi. E akoma më e vështirë është për prindërit që janë të
ndarë, që kanë peshën e kësaj gjendjeje”.
“Familja ka hyrë në krizë sepse është minuar besimi i anasjelltë ndërmjet familjes
e shoqërisë. Në shkollë janë cenuar marrëdhëniet ndërmjet prindërve e mësuesve. Shpesh
ekzistojnë tensioni e mosbesimi i anasjelltë, e pasojat e kësaj situate natyrisht
bien mbi fëmijë. Prirja është ajo që fëmijët përherë e më shumë t’u besohen ekspertëve
e kështu rrezikohet përjashtimi i prindërve nga jeta e bijve”. E Papa Françesku tregoi
një ngjarje personale që pati përjetuar kur ishte nxënës: “Një herë në shkollën time
mësuesja e thirri nënën time, folën mes tyre e pastaj më thirrën edhe mua. Nëna ime
më tha para mësueses se atë që bëra nuk ishte mirë e këndej më tha t’i kërkoj falje
mësues. E bëri këtë me butësi e përzemërsi e unë mbeta i kënaqur. Mirëpo kur u ktheva
në shtëpi vijoi kapitulli dytë...Sot sikur të ndodhte diçka e tillë, prindërit do
ta qortonin mësuesen, sepse teknikët (ekspertët) thonë se kështu nuk shkon puna mirë.
Pra, prindërit nuk duhet të vetpërjashtohen nga jeta e fëmijëve”.
Në anën tjetër, janë shumëzuar të ashtuquajturit “ekspertët”, që kanë zënë vendin
dhe rolin e prindërve edhe në aspektet më intime të edukimit të fëmijëve. Mbi jetën
afektive, mbi personalitetin e zhvillimin, mbi të drejtat e mbi detyrimet, “ekspertët”
dinë gjithçka: synimet, motivimet, teknikat. E prindërit duhet vetëm të dëgjojnë,
të mësojnë e të përshtaten. Të privuar nga roli i tyre, prindërit rrezikojnë kështu
të mënjanohen e të përjashtohen nga jeta e fëmijëve të tyre”. Kjo gjë duhet shmangur,
sipas Papës.
All the contents on this site are copyrighted ©. |