E diel 17 maj, Kisha katolike kremton solemnitetin e të Ngjiturit të Jezu
Krishtit në Qiell, që ndër shqiptarë njihet me emrin e të Shëlbuemit.
Liturgjia e festës të të Shëlbuemit na shkëput nga jeta e përditshme, për të na sjell
në kundrimin e misterit të Krishtit të vdekur e të Ngjallur. Ky mister i fesë së krishterë
e ka plotësimin e vet në të Ngjiturit “në qiell” të Jezu Krishtit, cili “ngjitet”
duke bekuar dishepujt e premtuar dhuratën e Shpirtit Shenjtë.
Kjo festë kujton se trishtimi për kthimin e Krishtit tek Ati Qiellor, shndërrohet
në gëzim, sepse Zoti na premton Ngushëlluesin. E është pikërisht Shpirti Shenjt Zot
që do t’i bindë ata që nuk besojnë, për lumninë përfundimtare të Krishtit dhe për
dënimin e tij të padrejtë me vdekje. Prandaj, me ndihmën e Shpirtit Shenjt ecim plot
shpresë në kërkim të së vërtetës së plotë, që gjendet në Jezusin e në Atin Qiellor,
lumturia e të cilit shkëlqen në mbarë universin, siç dëshmon kjo festë e të Shëlbuemit
që Kisha kremton të dielën e ardhshme.
Gjithnjë më 17 maj, kalendari përkujton shën Vitorin martir dhe shën Pashk Bajlonin, laik françeskan, pajtor i shoqatave eukaristike.
Të hënën më 18 maj, kalendari përkujton shën Gjonin I, papë e martir
Të martën më 19 maj, kalendari përkujton shën Çelestinin V, papë, shën Urbanin I papë, shenjtorët Parteni e Kallugjeri, martirë, e shën Krispinin nga Viterbo, rregulltar kapuçin.
Të mërkurën më 20 maj, kalendari përkujton shën Bernardinin e Sienës, françeskan e Shën Aurën, martire nga Ostia afër Romës
Të enjten më 21 maj, kalendari përkujton shën Kristoforin Magalanes me shokët e tij meshtarë, martirë në Meksikë dhe Shën Eugjenin de Mazenod, ipeshkëv i Marsejës, themelues i Oblatëve të Marisë.
Të premten më 22 maj, kalendari përkujton shën Ritën nga Kasha, rregulltare agostiniane, pajtore e njerëzve të pashpresë, së cilës Zoti i dhuroi dijen e forcën e Kryqit dhe e shën Julien, virgjër e martire.
Të shtunën më 23 maj, kalendari përkujton shën Gjon Baptist de Rosi, meshtar romak.
Të dielën e ardhshme më 24 maj, Kisha katolike do të kremtojë festën e Rrëshajëve. Këtë të diele, pra, bie festa e ditëlindjes së Kishës, sepse kremtimi i Rrëshajëve, festimi i Zbritjes së Shpirtit Shenjt Zot mbi Apostujt e mbledhur në Cenakull, së bashku me Marinë, shënon plotësimin e premtimeve të Krishtit, do të thotë dërgimin e Shpirtit Shenjt, për t’i ngushëlluar e ndihmuar dishepujt e vet në misionin, veprimtarinë, lodhjen e frikën e tyre. Jezusi u tha: “Do të ju dërgojë Shpirtin Shenjt. Ai do të ju japë forcë, guxim e entuziazëm”! Në zemër të Krishtit është burimi i asaj dashurie që Shpirti Shenjt e derdhi në zemrat tona duke na bërë të aftë ta duam Atin Qiellor, sikur e deshi Krishti, e duke na nxitur ti duam edhe vëllezërit e çdo njeri, siç na ka dashur Ai ne. Me ndihmën e Shpirtit Shenjt Zot, ecim plot shpresë në kërkimin e së vërtetës së plotë, që gjendet në Jezusin e në Atin Qiellor, lumturia e të cilit shkëlqen në mbarë universin.
All the contents on this site are copyrighted ©. |