Ուրբաթ 15 մայիս 2015-ի առաւօտեան ժամը 11:00-ին, Զմմառու Տիրամօր վանքի «Փոխեալ Սրբոյ
Կուսին» մայր եկեղեցիին մէջ լուսահոգի Հ. Սարգիս Ծ.Վրդ. Ուզունեանի յուղարկաւորութիւնն
ու թաղման կարգը կատարուեցաւ նախագահութեամբ Տանն Կիլիկիոյ Կաթողիկէ Հայոց Ամենապատիւ
Տէր Ներսէս Պետրոս ԺԹ. Կաթողիկոս-Պատրիարքի, Պատրիարքական Փոխանորդ և Զմմառու վանքի Մեծաւոր՝
Հ. Գաբրիէլ Թ.Ծ.Վրդ. Մուրատեանի, Արհիապատիւ եպիսկոպոսներու, Գերապայծառ Հայրերու, Գերապատիւ
վարդապետներու, Զմմառու վանքի Վարչական Հայրերու, Արժանապատիւ Քահանաներու և «Ս. Միքայէլ
և Երանելի Մալոյեան» դպրեվանքի ուսանողներու ներկայութեամբ և մասնակցութեամբ, Ամենապատիւ
Հոգեւոր Տէրը իր քարոզին մէջ անդրադառնալով Հ. Սարգիս Ծ.Վրդ. Ուզունեանի մասին, ըսաւ.
«Հ. Սարգիս մեծ Եղեռնին յաջորդող առաջին սերունդի զաւակներէն մէկը կը համարուի, որ տեսաւ
աքսոր, տառապանք, անօթութիւն և թշուառութիւն և սակայն վերապրեցաւ և նոր սերունդներու
դաստիարակ դարձաւ: Ան իր քահանայական կեանքին ընթացքին եղաւ բարի հովիւ մը և ամէնուն
ծառան: Ան 1967-ին ի վեր՝ երկար տարիներ ծառայեց Աւստրալիոյ Սիտնի և Մելպուռն քաղաքներուն
մէջ որպէս հոգեւոր հովիւ Հայ ժողովուրդի զաւակներուն: Ան դժուարին պայմաններու տակ յաջողած
էր հիմնել երկու ժողովրդապետութիւններ իրենց եկեղեցիներով: Յետ եկեղեցւոյ կարգին՝ միաբան
Հայրերը թափօրով և շարականներու երգեցողութեամբ ուղղուեցան Զմմառու վանքի միաբանկան դամբարանը,
ուր ամփոփուեցաւ հոգելոյս վարդապետին մարմինը:
Պաշտօնական ցաւակցութիւնները ընդունուեցան Զմմառու վանքի «Ս. Միքայէլ և Երանելի Մալոյեան»
դպրեվանքի դահլիճին մէջ:
Խնկանուէր աղօթք և յաւիտենական հանգիստ լուսահոգի վարդապետին անմահ յիշատակին:
«Հայր անոխակալ եւ բարեգութ, մաղթելով հայցեմք ի քէն վասն մեր ննջեցելոյն արժանաւորել
հանգստեան օթեւանի սրբոցն» (Շարական):
All the contents on this site are copyrighted ©. |