Կարդինալ Թակլէ ''Միջազգային Քարիթասի'' նոր նախագահ։

(Ռատիօ Վատիկան) Ֆիլիփինցի Կարդինալ Լուիս Անթոնիօ Թակլէ` Մանիլայի արքեպիսկոպոսը, 14 մայիս 2015-ին, Հռոմի մէջ գումարուած ''Քարիթաս Ինթերնացիոնալիսի'' լիանիստ ժողովի ընթացքին ընտրուեցաւ կաթողիկէ բարեսիրական կազմակերպութեան ընդհանուր նախագահ։

Մանիլայի ''խարիզմաթիք'' Արքեպիսկոպոսը կը յաջորդէ Հոնտուրասցի Կարդինալ Օսքար Ռոտրիկէս Մարատիակային որ ութը տարիներ ետք կը թողու իր այս պաշտօնը։ 

Հազիւ ընտրուած Կարդինալ Թակլէն հեռաձայնային կապով շնորհակալութիւն յայտնեց կազմակերպութեան 130 պատուիրակներուն, իրեն ցուցաբերած վստահութեան համար։

''Ես սահմանափակուած կարողութիւններ ունիմ - ըսաւ Ան - սակայն ձեր բոլորին հետ միասին, եւ այն սիրով զոր Յիսուս լեցուցած է մեր սիրտը, ու աշխարհի բոլոր աղքատ մարդոց անունով, կ՛ընդունիմ իմ այս ընտրութիւնս''։

Ան ապա աւելցուց ''Եկէք միասին ամրապնդենք աղքատներու եկեղեցին, որպէսզի մեր վկայութիւնը կարողանայ մեզ առաջնորդել դէպի հասկացողութեան, արդարութեան, իսկական ազատութեան եւ խաղաղութեան աշխարհ մը''։

Յայտնենք թէ Կարդինալ Թակլէն ''Միջազգային Քարիթասի'' առաջին նախագահն է որ կ՛ընտրուի Ասիայի ցամաքամասէն։  Ան ծնած է 21 Յունիս 1957-ին Մանիլայի մէջ։ 20 տարեկանին կը մտնէ Յիսուսեաններու Մանիլայի Սան Խոսէ նորընծայարան։ Քահանայ կը ձեռնադրուի` 27 փետրուար 1982-ին։

1991-ին Ուաշընկթոնի մէջ կ՛աւարտէ Աստուածաբանութեան Վարդապետի տիտղոսը։

22 հոկտեմբեր 2001-ին` Լուիս Անթոնիօ Թակլէ կ՛ընտրուի Իմուս թեմի եպիսկոպոս։ 2011-ի հոկտեմբեր 13-ին Պենետիկտոս ԺԶ վաստակաւոր Քահանայապետը զինք կը նշանակէ Մանիլայի Արքեպիսկոպոս ապա 24 նոյեմբեր 2012-ին, 55 տարեկանին, անոր կը շնորհէ Կարդինալական տիտղոսը։