Папа сустрэўся з Каралевай Швецыі

27 красавіка 2015 г. папа Францішак прыняў на аўдыенцыі Каралеву Швецыі Сільвію, якую суправаджалі члены яе сям’і і прадстаўнікі афіцыйнай дэлегацыі. Падчас аўдыенцыі размова вялася на іспанскай мове – роднай для Пантыфіка. Яе добра ведае манаршая асоба, паведаміў кіраўнік Залы Друку Апостальскай Сталіцы, кс. Фэдэрыка Ламбардзі. Каралева Сільвія паінфармавала Святога Айца аб дзейнасці Швецыі на карысць дзяцей, а Папа скарыстаўся магчымасцю, каб падзякаваць за адкрытасць краіны для бежанцаў і мігрантаў.

Яе Вялікасць падарыла Францішку малітоўнікі для дзяцей на шведскай мове. Каралева ўдзяляла асаблівую ўвагу рэлігійнаму выхаванню сваіх дзяцей, што высока ацаніў Пантыфік.

У аўдыенцыі прымалі ўдзел таксама шведская прынцэса Мадлен, са сваім мужам і гадавалай дачкой Леанорай. Святы Айцец удзяліў асабліва цёплую ўвагу гэтай сям’і, заўважыў кс. Ламбардзі.

У рамках свайго візіту ў Ватыкан каралева Сільвія прыме ўдзел у семінары, арганізаваным Папскай акадэміяй сацыяльных навук і Пасольствам Швецыі пры Апостальскай Сталіцы на тэму барацьбы з гандлем людзьмі, з асаблівай увагай на ахвяры сярод дзяцей. Яна таксама наведае Ватыканскую бібліятэку, дзе адбудзецца інаўгурацыя новага “Стала замоў”, зробленага дзякуючы падтрымцы шведскага Фонда імя караля Густава VI Адольфа.