Հայոց Ցեղասպանութեան 100-ամեակին նուիրուած ձեռնարկներ

Հայոց Ցեղասպանութեան 100-ամեակին առթիւ՝ Հայ Կաթողիկէ Պատրիարքութիւնը Ապրիլեան նահատակաց յիշատակին կազմակերպած է հետեւեալ ձեռնարկները.
Երեքշաբթի 21 Ապրիլ 2015-ին, գիշերուայ ժամը 8:00-ին, Հսկում տեղի պիտի ունենայ Հայ Կաթողիկէ Պատրիարքարանի Մեծ Եղեռնի Յուշակոթողին շուրջ, ի ներկայութեան Հայ Կաթողիկէ Հոգեւորական դասուն, պետական անձնաւորութիւններու, համայնքային ներկայացուցիչներու, Հայկական կուսակցութիւններու և միութիւններու ներկայացուցիչներու և մասնակցութեամբ Զմմառու դպրեվանքի սաներուն, Ս. Մեսրոպի Սկաուտախումբի Արիներուն, ՀԿՀՄ համալսարանական հայ ուսանողներու Միութեան, ՀԿՄ Պատանեկան Միութեան, ՀԿՄ Շեփորախումբին և հաւատացեալ ժողովուրդին:
Հինգշաբթի 23 Ապրիլ 2015-ին, տեղի պիտի ունենայ «ԶԱՆԳԵՐՈՒ ՂՕՂԱՆՋ», ժամը 18:00-ին: 1915-ի Մեծ Եղեռնի համազգային ոգեկոչումին իբրեւ խորհրդանիշ, մեր եկեղեցիներուն զանգերը պիտի հնչեցնեն 100 զարկ, որոնց պիտի յաջորդէ Տէրունական Աղօթքի և Սուրբ Սուրբի երգեցողութեան կատարում Հայ Կաթողիկէ Պատրիարքարանի Մեծ Եղեռնի Յուշակոթողին շուրջ:
Ուրբաթ 24 Ապրիլ 2015-ին, կէսօրէ ետք ժամը 12:30-ին, «ՔԱՅԼԱՐՇԱՒ» տեղի պիտի ունենայ Անթիլիասէն մինչեւ Պուրճ Համուտի քաղաքապետարանի դաշտ:
Կիրակի 26 Ապրիլ 2015-ին, երեկոյեան ժամը 5:00-ին, Ձայնաւոր Սուրբ Պատարագ պիտի մատուցուի Ս. Գրիգոր Լուսաւորիչ Ճեմարանի բակին մէջ, Ժէիթաուի: Ս. Պատարագը պիտի մատուցանէ և պիտի պատգամախօսէ Արհի. Հ. Գէորգ Արք. Խազումեան: Պատարագի Երգեցողութիւնը պիտի կատարէ «Կռունկ» Պատրիարքական երգչախումբը, ղեկավարութեամբ՝ դոկտ. Եդուարդ Թորիկեանի: