Նախարար Տիար Սէյրան Օհանեան այցելեց Զմմառու մայրավանք

Կիրակի 12 Ապրիլ 2015-ին, Յինանց Կարմիր Կիրակիին, առաւօտեան ժամը 11:30-ին, Հայաստանի Հանրապետութեան Պաշտպանութեան նախարար՝ Տիար Սէյրան Օհանեան, ընկերակցութեամբ պետական և պաշտօնական անձնաւորութիւններու պատմական այցելութիւն մը տուաւ Զմմառու Տիրամօր մայրավանք: Յարգոյ հիւրին կ'ընկերանար Լիբանանի մօտ Հայաստանի Դեսպան՝ Տիար Աշոտ Քոչարեան: Զմմառու Պատրիարքական Փոխանորդ և վանքի Մեծաւոր՝ Հ. Գաբրիէլ Թ.Ծ.Վ. Մուրատեան ինչպէս նաեւ Վարչական Հայրերը ընդունեցան հիւրերը, որոնք մասնակցեցան մատուցուող Սուրբ և Անմահ Պատարագին: Այնուհետեւ ներկաները ուղղուեցան Վանքի դահլիճը, ուր Վանքիս Մեծաւորը յանուն Հայ Կաթողիկէ Պատրիարք Հօր, Միաբանութեանս և իր Վարչութեան՝ բարի գալուստ մաղթեց և սրտի անհուն գոհունակութիւնը յայտնեց պատմական այս այցելութեան համար, որով Մայր Հայրենիքը սփիւռքահայ կառոյցներուն կողքին կը կանգնէր: Նախարարը իր կարգին մեծ հետաքրքրութեամբ հետեւեցաւ Զմմառու վանքի հոգեւոր և կրթական կեանքին, շնորհակալութիւն յայտնեց այս սիրալիր ընդունելութեան համար և գնահատեց և քաջալերեց ի տես Զմմառու վանքին մէջ կատարուած հոգեւոր և մշակութային աշխատանքներուն: Այս առթիւ՝ հիւրերը այցելեցին վանքիս զանազան բաժանմունքները ինչպէս՝ Թանգարան, Մատենադարան, Հնատիպերու բաժին, Ձեռագրատուն և Գինեմառան: Յուշանուէրներու փոխանակումէն ետք՝ Պրն. Նախարարը հիացմունքով անդրադարձաւ Զմմառու վանքի ճարտարապետական կառոյցին, մշակութային ժառանգութեան և հոգեւոր կեանքին, մաղթելով որ այսպէս՝ Զմմառու վանքը մնայ հաւատարիմ՝ հայ ժողովուրդի առաքելութեան: