(Ռատիօ Վատիկան) ''Սուրիոյ քրիստոնեաները դժուար օրեր կ’ապրին Իտլիպի անկումէն ետք, զանազան վայրերու քրիստոնեաները սարսափի ու վախի մէջ կը գտնուին։ Սակայն հակառակ զարհուրանքի ու վախի, եկեղեցիները` Աւագ Շաբաթուան առթիւ, կը վխտան հաւատացեալներով'' կը հաղորդէ գերապայծառ Ժորժ Ապու Խազէն` Հալէպի լատիններու թեմին առաքելական Փոխանորդը , մատնանշելով որ յուզիչ էր տեսնել Ծաղկազարդի Կիրակիի ընթացքին, հաւատացեալներու ջերմ մասնակցութիւնը սուրբ արարողութիւններուն, իրենց մանուկներուն հետ միասին։
''Իրապէս հաւատքը աւելի հզօր է քան վախը։ Անոնց վկայութիւնը մեզի` հովիւներուս համար, եղաւ աղբիւր քաջալերանքի։ Շնորհիւ անոնց հաւատքին ու աղօթքին` Յարուցեալ Տէրը պիտի փրկէ մեզ'' յայտնեց Առաքելական Փոխանորդը, որուն վկայութեամբ Հալէպի մէջ տիրող վախի ու դժուարութիւններուն ենթակայ են ոչ միայն քրիստոնեաները այլեւ մահմետականները։
''Շնորհիւ Քարիթասի օգնութիւններուն, երաշխաւորուած բոլորին` անխտիր, գորովալիր վկայութիւններ կ՛ընդունինք մահմետականներէն։ Ասիկա համակեցութեան մեծ փաստ մըն է։ Ամէնքը կը վախնան իսլամական պետութեան ռազմիկներու խուժումէն, սակայն քրիստոնեաները կ’ապրին Ճանապարհ Խաչը` Յարութեան յոյսով'' հաստատեց գերապայծառ Ապու Խազէն որ հաւատացեալներուն ուղղած հովուական թուղթին մէջ ընդգծած է որ Յարուցեալ Քրիստոսը քէն չպահեց, այլ իր աշակերտները ուղարկեց քարոզելու բարի լուրը, սէրն ու ներումը։ Հաւատացեալները դրականօրէն ընկալեցին պատգամը, մեր աղօթքն է որ Տէրը գործածէ մեզ որպէս նշան եւ խաղաղութեան վկայութիւն։
All the contents on this site are copyrighted ©. |