Պոլսոյ Հայկական Եկեղեցւոյ պատին հակահայկական նոր գրութիւն յայտնուած է։
«Ակօս» կը հաղորդէ, որ Պոլսոյ Պաքըրքէօյ շրջանի Ս. Աստուածածին եկեղեցւոյ պատին հայերուն նկատմամբ ատելութիւն սերմանող գրութիւններ յայտնուած են:
Անցեալ շաբաթ, անյայտ անձեր եկեղեցւոյ պատին գրած էին. «Ինչ օգուտ, եթէ հայ ըլլաք, եթէ մեզմէ մէկը Օկիւն Սամասթն է»:
Այս արտայայտութիւնը ընկերային ցանցերուն վրայ մեծ աղմուկ յառաջացուցած է, ինչէն ետք` չորեքշաբթի օր, եկեղեցւոյ պատին յայտնուած է հետեւեալ նոր գրութիւնը. «Օրհնեալ տարի` 1915»:
Այդ գրութիւնները արդէն ներկուած ու ծածկուած են, եւ եկեղեցւոյ հիմնադրամի ղեկավար Մեսութ Էօզտեմիր կը նշէ, որ եկեղեցւոյ պատը մարդաշատ շրջանի մէջ է, եւ կարելի չէ բացայայտել, թէ ատիկա ո՛վ գրած է:
Փետրուարին նոյն եկեղեցւոյ պատին այսպէս կոչուած «Խոջալուի ցեղասպանութեան» նուիրուած ցեղապաշտական պաստառ մը կախուած էր, ինչ որ, սակայն, աւելի ուշ հեռացուած էր ոստիկաններուն միջամտութեամբ:
| All the contents on this site are copyrighted ©. |