Shqipëri, Nishani: Të shembim bunkerët e krimit dhe korrupsionit

“25 vite më parë shembëm bunkerët e komunizmit, ndërsa sot duhet të shembim bunkerët e krimit e korrupsionit dhe të ndërtojmë shtetin ligjor. Krimi dhe korrupsioni nuk duhet të gjejnë vend në shoqërinë tonë. Kërkoj me forcë që e gjithë klasa politike të largojë pa ekuivok individët e përfshirë në krim”. Kështu pohon mes tjerash në një deklaratë  Presidenti i Republikës së Shqipërisë, Bujar Nishani, gjatë konferencës “24 vjet partneritet strategjik Shqipëri-SHBA”, mbajtur me rastin e përvjetorit të rivendosjes së marrëdhënieve mes Shqipërisë e Shteteve të Bashkuara të Amerikës.

Presidenti Shqipërisë Bujar Nishani iu drejtua edhe sistemit të drejtësisë me thirrje që “të mos bjerë pre e presioneve të këtyre individëve, por të zbatojë me përpikmeri ligjin”. “Ne nuk duhet ta ndëshkojmë demokracinë, por ta ndihmojmë të rritet sipas modelit perëndimor”, theksoi Presidenti Nishani.