Ֆրանչիսկոս Քահանայապետի 6 մարտի գործունէութիւնը։

Ուրբաթ, 6 մարտ 2015-ին, առաւօտեան ժամը 9.00 ին, Ֆրանչիսկոս Սրբազան Քահանայապետը  Առաքելական պալատի REDEMPTORIS MATER մատրան մէջ, մասնակցեցաւ` Քահանայապետական տան Քարոզիչ` Հայր Ռանիէրօ Քանթալամէսայի  Քառասնորդաց շրջանի շաբաթական խորհրդածութիւններու երկրորդ նիստին։  Հայր Քանթալամէսայի 2015- քառասնորդացի խորհրդածութիւններու որպէս ընդհանուր նիւթ ընտրած  է` ''Երկու թոքեր , մէկ շունչ, արեւելք եւ արեւմուտք միացած դաւանած միեւնոյն հաւատքին մէջ'', իսկ այսօրուայ խորհրդածութիւնը կեդրոնացուց հետեւեալ չորս նիւթերու վրայ` ''Միասին դնել այն ինչ որ մեզ կը միացնէ'', ''Աստուծոյ միութիւնը եւ երրորդութիւնը'', ''Բաց ձգուած երկու ճանապարհներ'' եւ ''Միացած Սուրբ Երրորդութեան պաշտամունքի մէջ''։

Խորհրդածութեան աւարտին, ժամը 09.45 ին, Նորին Սրբութիւնը իր գրասենեակին մէջ ընդունեց Հաւատոյ ժողովի կառավարիչը կարդինալ Կէրարտ Լուտվիկ Միւլէրը որմէ ետք ընդունեց Ազրպէյճանի հանրապետութեան նախագահ` Իլհամ Ալիեւը,  անոր կողակիցն ու իրենց ընկերացող պատուիրակութիւնը։

Ժամը 11.15ին,  Սրբազան Հայրը ընդունեց Չիլէի Օրսոնօ թեմի ''թափուր աթոռի'' առաքելական հոգաբարձու`  գերապայծառ Ֆէրնանտօ Նաթալիօ Շոմալի Կարիպը։

Հուսկ՝ ժամը 11.45ին, Պօղոս Զ անուան սրահին մէջ, Ֆրանչիսկոս Պապը ունկնդրութիւն  շնորհեց, Նէոքաթեքումենալ շարժումի պատկանող աւելի քան 7000 անդամներուն,

Արժանի է նշել, շարժումի հիմնադիր Տիար Քիքքօ Արկիլօ ՝  իր արտասանած բացման խօսքին մէջ յատկուկէն ողջոյնեց Տանն Կիլիկիոյ Կաթողիկէ Հայոց Ներսէս Պետրոս ԺԹ Կաթողիկոս Պատրիարքին որ  իր մասանկցութիւնը բերաւ սոյն հաւաքին ։

Նէոքաթեքումենալ շարժումի 21 հազար հասարակութիւնները կը գործեն ու ներկայ են 124 պետութիւններու մօտ, իրենց մէկ միլիոն անդամներով։

Շարժումը ունի 103 նորընծայարաններ որոնց առաջինի բացումը կատարուած է Հռոմի մէջ­, երջանկայիշատակ Յովհաննէս Պօղոս Բ  քահանայապետի կողմէ 1987 թուականին։

Նէոքաթեքումենալ շարժումի առաջին ընտանիքները  առաքելութեան ուղարկուած են 1985 թուականին, միշտ Յովհաննէս Պօղոս Բ Քահանայապետի կողմէ։ 

Իսկ առաջին '' missio ad gentes – ոչ քրիստոնեայ ժողովուրդներու առաքելութիւնը'' սկիզբ առած է վաստակաւոր Քահանայապետ` Պենետիկտոս ԺԶ-ի օրով։ Մինչեւ օրս կան 96 առաքելութիւններ որոնցմէ 25-ը Եւրոպայի մէջ, 9 Ամերիկայի մէջ, մէկը Ասիայի մէջ, 3 Ովկիանիայի մէջ։ 

6 Մարտ 2015-ին Ֆրանչիսկոս Քահանայապետը այլ 31 առաքելութիւններ կ՛ուղարկէ որոնցմէ 16-ը Եւրոպական երկիրներուն, 4-ն Ամերիկա, 9 Ասիական ցամաքամաս եւ երկուքը Ովկիանիա։