Thirrje e Papës për paqe në Lindjen e Mesme, Afrikën Veriore e Ukrainë
Në audiencën e përgjithshme Papa bëri thirrje për Lindjen e Mesme, Afrikën Veriore
e Ukrainën. Thirrja e parë u nis prej masakrës së koptëve egjiptianë nga ana e xhihadistëve
të të ashtuquajturit Shtet Islamik: “Dëshiroj të ftoj përsëri për t’u lutur për
vëllezërit tanë egjiptianë të cilët, tri ditë më parë, u vranë në Libi vetëm pse ishin
të krishterë. Zoti i pranoftë në shtëpinë e tij e u dhëntë ngushëllim familjeve e
bashkësive të tyre. Të lutemi edhe për paqen në Lindjen e Mesme e në Veri të Afrikës,
duke kujtuar gjithë të vdekurit, të plagosurit e refugjatët. Uroj që bashkësia ndërkombëtare
ta zgjidhë me rrugë paqësore situatën në Libi” Duke u drejtuar, pastaj përshëndetjen
e tij shtegtarëve të gjuhës arabe, posaçërisht atyre që kishin ardhur nga Toka Shenjte,
Iraku e Lindja e Mesme, Papa tha: “Jezusi, me mishërimin e tij, ndriçoi përvojën
e vëllazërisë njerëzore, duke i hapur horizontet për ta mirëpritur çdo njeri, posaçërisht
më të varfrit e më nevojtarët. Ai krijoi frymën e vëllazërisë, që kapërcen çdo pengesë
ngjyre, gjuhe e kulture, për t’i përqafuar të gjithë njerëzit, kur na mësoi t’i drejtohemi
Hyjit, duke e quajtur ‘Ati ynë’! Zoti ju bekoftë e ju mbrojtët të gjithë nga i keqi”. Së
fundi, duke përshëndetur ipeshkvijtë e Ukrainës, këto ditë në Vatikan për vizitën
e tyre “ad Limina Apostolorum” si dhe shtegtarët e dioqezave, që i shoqërojnë, kujtoi: “Vëllezër
e motra, e di se ndërmjet shumë ndjeteve, që sillni tek Varret e Apostujve, është
edhe lutja për paqe në Ukrainë. E kam në zemër të njëjtën dëshirë e bashkohem me lutjen
tuaj, që të vijë sa më parë paqja e qëndrueshme në atdheun tuaj. Zoti ju bekoftë!”.