Ati i Shenjtë: koptët vriten vetëm pse të krishterë, gjak që bërtet
I vranë, vetëm pse ishin të krishterë: këtë pohoi Papa gjatë një takimi, në Vatikan,
me përfaqësues të Kishës së reformuar të Skocisë, nësa kujtonte më se 20 koptët egjiptianë,
të vrarë nga xhihadistët e Shtetit Islamik. Duke iu përgjigjur
fjalimit të moderatorit të Kishës së Skocisë, Françesku shprehu dhimbjen e thellë
për ekzekutimin e të krishterëve koptë: “Thoshin vetëm: ‘Jezus, ndihmomë!’. U vranë
vetëm pse ishin të krishterë. Ju, vëlla, kujtuat, gjatë fjalës suaj, atë, që po ndodh
në Tokën e Jezusit. Gjaku i vëllezërve tanë të krishterë është dëshmi, që bërtet.
Janë katolikë, ortodoksë, koptë, luteranë, kjo nuk ka pikë rëndësie: janë të krishterë!
E gjaku është i njëjtë. Gjak, që dëshmon Krishtin. Duke i kujtuar këta vëllezër, që
vdiqën vetëm e vetëm për të dëshmuar Krishtin, kërkoj ta inkurajojmë njëri-tjetrin
për të ecur përpara me këtë ekumenizëm, ekumenizëm gjaku. Martirët janë të gjithë
të krishterë”. Në fjalën e tij Papa theksoi se është e nevojshme që gjithë të krishterët
të angazhohen së bashku në shërbim të Ungjillit e të kauzës së Krishtit, duke kujtuar,
në vijim, kontributin e Skocisë për përhapjen e krishterimit dhe dëshminë e të krishterëve
të sotëm skocezë, bazë për forma të reja bashkëpunimi dhe dëshmie të përbashkët: “Vetëm
duke bashkuar forcat, theksoi, mund t’i shërbejmë si duhet familjes njerëzore e ta
përhapim dritën e Krishtit deri në skajet më të errta të zemrave e të botës”.