Çmim për Radio Vatikanin. Atë Lombardi: të angazhuar për të qenë forcë dialogu
Me rastin e Ditës Ndërkombëtare të Radios, emitentja jonë, e cila të martën e kaluar
mbushi 84 vjeç, duke mbetur gjithnjë krejt e re, u nderua, në Madrid, me “Çmimin Ndërkombëtar
të Akademisë Spanjolle të Radios”. Çmimi iu dorëzua, në emër të Radios, nuncit apostolik
në Spanjë, imzot Renzo Fratini. Në videomesazhin e rastit, drejtori ynë i përgjithshëm,
atë Federiko Lombardi, nënvizoi se Radio Vatikani vijon angazhimin e saj historik
në shërbim të Kishës e për dialogun dhe bashkimin e mbarë njerëzimit. Mbetet përherë
Radio, që ia kushton gjithë veprimtarinë e vet mbrojtjes së paqes, të të drejtave
të njeriut dhe lirisë fetare. Zëri i saj ndjek gjithnjë me vëmendje “periferitë e
botës e të njerëzve”, për t’i shërbyer, kështu, gjithnjë, komunikimit për unitetin
e mbarë njerëzimit, si zë, që dëgjohet në mbarë rruzullin tokësor. Kjo është motoja
e ekzistencës sonë, të cilën e jetojmë si mision, të frymëzuar nga shpirti i Ungjillit
e sot, nga mësimi e veprimtaria e Papës Françesku. Drejtori i Radio Vatikanit e përfundoi
videomesazhin e tij duke falënderuar Akademinë për çmimin e lartë që, theksoi, është
inkurajim për të vijuar në këtë mision, duke e ndjerë fort solidaritetin me bashkësinë
e madhe të komunikatorëve. Nuk është i vetmi vlerësim që i bëhet Radio Vatikanit.
Ndërmjet tjerëve, kujtojmë se më 10 nëntor 2005, presidenti i asokohshëm i Republikës
së Shqipërisë, Sali Berisha, i dorëzoi emitentes sonë “Urdhërin Nënë Tereza”. Atë
Lombardi, që e mori plot entuziazëm, pati theksuar: “Është Urdhër i titulluar
‘Nënë Tereza’, Urdhër paqeje, mëshire, dialogu, dashurie. Mbart mesazhin e madh se
ne do të vazhdojmë t’i shërbejmë Shqipërisë me këtë frymë: frymë paqeje, dialogu e
dashurie”. Urdhëri i artë varet në gjoksin e Radio Vatikanit, ndërmjet
shumë medaljeve të tjera, simbol i ndihmesës që dhanë Papët për lirinë e Kombeve të
skllavëruara të lindjes. Zëri i tyre i fuqishëm i kapërceu telat me gjemba, për të
hyrë në çdo vatër, që kishte etje për një fjalë të lirë, për një kumt të gëzuar, një
shpresë, një rreze drite.