Muzeu dioqezan në Sapë një dëshmi e vlerave të përjetshme

Dioqeza e Sapës, në kohën e festës së Krishtlindjes dhe ato të fund vitit 2014 organizoi me Miqtë e Zadrimës, tashmë të pagëzuar në “Miqtë e Sapës” një takim, që ka nisur para 10 vitesh, për të çuar përpara disa projekte në fushën e edukimin dhe zhvillimit të kësaj dioqeze të lashtë, posaçërisht në fushën e vreshtarisë, ullishtës dhe blegtorisë. Me rastin e këtij takimi, mes tjerash, u inaugurua edhe Muzeu Dioqezan i Sapës, i pari i këtij lloji në Shqipëri, të paktën në rangun kishtar.
Ipeshkvi i dioqezës së lashtë shqiptare të Sapës, Imzot Lucjan Avgustini e cilëson këtë muze, si “një muze simbolik të vogël por që flet shumë dhe mbart vlera të mëdha historike kombëtare e kishtare”. Sipas ipeshkvi të Sapës, “gjërat e bukura dhe me vlerë duhet të vihen në pah, për të mirën e të gjithëve dhe jo të mbahen të mbyllura në sirtar. Shpresoj – shton ai - që kjo nismë e cila është e para në Dioqezën tonë, të shumohet edhe në dioqezat e tjera dhe në zemrat e njerëzve, e të dimë të bashkëpunojmë me njëri-tjetrin për dëshminë e kulturës duke lënë gjurmë, dhe për të shkruar faqe e rëndësishme të historisë sonë nëpërmjet objekteve apo gjërave që kanë të bëjnë me traditën, kulturën e popullit dhe vendit tonë”, përfundoi ipeshkvi.
Mbi idenë e krijimit të këtij muzeu dioqezan dhe përmbajtjen me sende e dëshmi të rëndësishme historike, nga e kaluara e lashtë deri te ajo e kohëve të fundit, siç është periudha e persekutimit nën diktaturën ateiste e tjera, më hollësisht në mikrofonin e Radio Vatikanit flasim me ipeshkvin e vendit, imzot Lucjan Avgustini......

Muzeu dioqezan i Sapës është me vlera të veçanta e përmban sende dhe objekte kishtare dhe arkeologjike të gjetura, të mbledhura dhe të ruajtura ndër vite. Ndër më të veçantat janë:

veshjet e vjetra liturgjike të punuara me dorë;
regjistra pagëzimi që në vitet 1800;
rrobat, enë liturgjike dhe libri i meshës me të cilët ka kremtuar meshën dom Prenk Qafalia në Gjegjan të Pukës;
libri i meshës dhe enët liturgjike me të cilët ka kremtuar meshën Dom Ejll Kovaçi;
kryq dhe piksidë e përdorur prej dom Jak Zekës;
gurë elteri me relike brenda saj e kishës së vjetër në Gjegjan;
kumbona e kishës së Zojës në Dejë, e cila pati fatin e keq të rrënohej me dinamit;
pjesë të thyera të këmbanës së kishës së Shën Lukës në Gomsiqe;
kumbona e vjetër e vitit 1791;
kelk i cili është përdorë për kremtimin e meshës në burg;
gurë të gdhendur të katedrales së vjetër të Sapës në Nënshat;

Një vend i veçantë iu është rezervuar edhe martirëve të Kishës Katolike në Shqipëri e shoqëruar me hartën e burgjeve dhe kampeve famëkeqe gjatë diktaturës komuniste. Por në këtë muze nuk mund të mos mungonte gjithashtu edhe këndi kushtuar vizitës së Atit të Shenjtë Papa Françeskut në Tiranë si dhe një pjesë e dëshmisë së të mbijetuarës së komunizmit, motrës Stigmatine, Marie Kaleta.