Vaji i foshnjës në Meshë, është predikim i Zotit e i jetës!
Fëmijët qajnë. Për arsye të ndryshme. Qajnë nga dhimbja, nga uria, nga kush e di ç’arsye
tjetër. Është e vetmja mënyrë për t’u komunikuar të rriturve se kanë nevojë për diçka.
Fëmijët qajnë ditën, e edhe më shumë natën. Qajnë në shtëpi, e qajnë edhe në kishë,
kur prindërit i marrin me vete, që mbi ta të bjerë bekimi i Zotit. Shumëkush shqetësohet
nga ky vaj. E ka edhe nga ata, që duan t’i largojnë nga kisha, pse u prishin qetësinë,
u prishin kundrimin, heshtjen e plotë të bisedës me Hyjin. Po Françesku, më se
një herë, kujton se vaji i fëmijëve, është më i bukuri kor i Meshës! Është tingull
gazmor e predikim për jetën! Vaji i vogëlushëve ia kalon predikimit të meshtarit. Papës
i pëlqen jashtëzakonisht të dëgjojë vajin e foshnjës në Kishë. I duket si këngë. E
këngë është ky vaj. Premtim për jetën. Kur qan fëmija në kishë, në meshë, disa veprimtarë
të famullisë u afrohen, i lëshojnë një “shëëët” ferishtes e u kërkojnë prindërve ta
nxjerrin përjashta, sepse shqetëson besimtarët në lutje e meditim. Por, a ka lutje
më kuptimplote, sesa e qara e foshnjës? Ky himn i jetës? A ka meditim më të thellë,
se e qara e foshnjës, që të kujton rikthimin e përhershëm të pranverës në në jetët
njerëzore? Jo, fëmija nuk duhet nxjerrë përjashta, duhet të rrijë në Kishë, si mysafiri
më i dëshiruar, sepse gugatja e tij është predikim i Zotit, predikim i jetës”. Këtë
na kujton Papa Françesku!