Vatikan: Kardinali Parolin, Mesdheu të kthehen në vend respekti e takimi
“Viteve të fundit Mesdheu është përballuar me shumë sfida, si të brendshme e po kështu
edhe të jashtme. Këto sfida nuk janë vetëm brenda një vendi apo një tjetri kufiri
kombëtar, por janë, realisht, sfida transkombëtare e transrajonale. Këndej asnjë
Vend nuk mund të rri e të jetë i shkëputur nga situatat e Vendeve tjera e, në të njëjtën
mënyrë, as rajoni mesdhetar, i goditur nga kriza e brendshme, nuk është i paprekshëm
nga efektet e krizës së rajoneve kufitare, si Afrika subsahariane e Lindja e Mesme”.
Kështu tha mes tjerash Sekretari i Shtetit të Vatikanit, kardinali Pietro Parolin
në mesazhin e tij mbajtur në Sesionin e nëntë plenar të Asamblesë parlamentare të
Mesdheut që përfundon sot në Mònako, në të cilin, kardinali Parolin uron që Mesdheu,
prej mijëvjeçarësh vend takimi i kulturave dhe popujve, të mund të “rimëkëmbet” e
të kthehet të jetë përsëri vend “respekti të anasjelltë dhe të bashkëjetesës paqësore”.
Nga ana e saj, shtoi kardinali Parolin, “Selia e Shenjtë, vlerëson rastin për t’i
dhënë mbështetje synimit të parë të kësaj asambleje të përfaqësuesve parlamentarë
të rajonit mesdhetar, do të thotë promovimit të një dialogu politik bazuar mbi parimet
e përbashkëta të të gjitha traditave e kulturave”.