E diel 8 shkurt, Kisha katolike kremton të dielën e 5-të gjatë vititliturgjik.
Gjithnjë më 8 shkurt kalendari kujton shën Jeronim Emilianin dhe shën Jozefina Bakita.
Leximet e kësaj së diele flasin për vuajtjen në jetë: Jobi në dhimbjen e tij,
i drejtohet Hyjit; Jezusi vepron si mjek i shpirtrave e trupave: Pali apostull pohon
se ndan bashkë me vëllezërit e vuajtur ligështitë e tyre. Të hënën më 9 shkurt,
kalendari kujton shën Apolloninë e shën Maronin. Ungjilli i kësaj dite na
tërheq vëmendjen drejt faktit se edhe nëse gjërat e jashtme mund të na prishin, nuk
duhet të harrojmë se problemi i vërtetë është brenda, në korruptimin e zemrës.
Të
martën më 10 shkurt, kalendari kujton shën Skolastikën, virgjër, shën Silvanin
dhe të Lumin Alojze Stepinac. Ndërsa shumë ndjekës të Jezusit janë thjesht formalë
e vërejnë edhe gjënë më të vogël që s’shkon, sjellja këmbëngulëse e gruas pagane shpreh
karakteristikën thelbësore të fesë, që shpesh na mungon. Ungjilli i ditës, na fton
pra të mos u japim tepër rëndësi rregullave e ligjeve, por zemrës së pastër. Të
mërkurën më 11 shkurt, Kisha Katolike kremton festën e Zojës së Lurdës,
Zoja e mrekullive dhe e shërimit të sëmundjeve. Më 11 shkurt kremtohet Dita
e 23-të botërore e të sëmurit. Leximet biblike na japin të kuptojmë se është
i Lum e pra, i shëruar, është ai njeri të cilit i janë falur mëkatet. Vetëm Jezusi
na liron, na bashkon e na shtyn t’i thurim lavde veprave të Zotit. Të enjten
më 12 shkurt, kalendari kujton shenjtorët martirë të Abitenit dhe shën Benediktin
e Anianit. Leximet e ditës vënë në pah vëmendjen që i jepet Eukaristisë në predikimin
e apostujve. Është një mrekulli, që zbulon mëshirën e Jezusit për ne dhe nevojën tonë
për t’u ushqyer me bukën e jetës. Në këtë ditë, Radio Vatikanit feston përvjetorin
e themelimit. Të premten më 13 shkurt, kalendari kujton të Lumin Jordani
i Saksonisë, meshtar dominikan. Liturgjia na kujton porosinë e Krishtit: “Ruhuni
nga tharmi i farizejve dhe i Herodit!”. E kjo do të thotë se njeriu i drejtë, larg
çdo hipokrizie e servilizmi, nuk lakmon pasuri: i mjafton ‘Buka e Zotit’, që është
vetë Jezu Krishti. Në historinë e Kishës të gjitha veprat e mëdha nisin nga përvujtëria
e vogëlsia e njerëzve fare të papërfillur nga bota, por tepër të pëlqyer nga Zoti. Të
shtunën më 14 shkurt, kalendari kujton Shën Çirilin, murg e Shën Metodin, ipeshkëv,
Pajtorë të Evropës si dhe Shën Valentinin, ipeshkëv e martir. Shembulli i jetës
së tyre na kujtojnë se mbarë kufijtë e tokës do të shohin shëlbimin që vjen nga Zoti
përmes nxënësve të tij, të cilët në rrjedhë shekujsh venë në jetë porosinë e Krishtit:
“Shkoni në mbarë botën e predikoni Ungjillin!”. E Pajtorët e Evropës, që Kisha do
t’i kremtojë më 14 shkurt, qenë pionierë të inkulturimit, përmes të cilit krijohen
kushtet që feja në Hyjin të rrënjoset në çdo kulturë. Të dielën e ardhshme më
15 shkurt, Kisha do të kremtojë të dielën e 6-të gjatë vitit e gjithnjë më
15 shkurt kalendari kujton Shën Onezimin, nxënësin e Shën Palit, dhe Shën Faustinin
e Shën Gjovitën, martirë. Këta na kujtojnë se mbarë popujt e tokës do t’i shërbejnë
Zotit, por edhe se nuk është aspak e lehtë të ecësh gjithnjë në dritën e Atij të Lumit.
Na e vërteton Shën Pjetrit, i cili ishte tepër i kënaqur që mundi të shpallë se Jezusi
ishte Krishti, në sa nuk donte ta pranonte se vullneti i Zotit ishte që Biri i njeriut
të vuante e të vdiste në kryq.