Me 3 shkurt kalendari kujton Shëna Vlashin

Sot me 3 shkurt kalendari kishtar përkujton Shëna Vlashin, mrekullibërës, ipeshkëv i Sebastes së Armenisë, (Sibusi i sotëm në Turqi), Pajtor qiellor i Raguzës, që kremtohet edhe në Sicili me Festën e bukëve, e jo më pak në krahinën e Kurbinit të Shqipërisë, sidomos në Laç ku, pikërisht nën Shenjtoren e Shëna Ndout të Padovës, ruhet edhe sot e kësaj dite shpella në të cilën thuhet se qe fshehur Shëna Vlashi gjatë persekutimeve fetare kundër të krishterëve nën Dioklecianin perandor, apo, sipas gjasave, nën Julianin Apostata, në fillim të shekullit IV.
Aty edhe u kap e iu dorëzua gjyqit, si bari i të krishterëve e kundërshtar i Perandorit. Pas shumë mundimesh që iu bënë, me qëllim që ta shtrëngonin të mohonte fenë, iu pre koka, me urdhër të Agrikolaut, sundimtar i Kapadoçies, më 3 shkurt të vitit 316 pas Krishtit.
Është shkruar shumë për Shëna Vlashin e për vendlindjen e tij. Studiesi e arkeologu shqiptar Atë Shtjefën Gjeçovi e, pas tij, edhe studiues të tjerë, si Atë Vinçenc Malaj, kanë sjellë argumente për të vërtetuar se Shenjti nuk ka lindur në Armeni - siç besohet, por në Arbëni e se emri i vendlindjes është i shkruar gabim. Shumë të dhëna vërtetojnë se Shëna Vlashi, në mos ka lindur, sigurisht ka jetuar në trevat e Shqipërisë së sotme.
Për nder të Shëna Vlashit janë ngritur një sërë Kishash kudo në botë, e edhe në Romë, ku në Kishën e Shenjtit në Campo di Marzo sot u kremtua festa liturgjike e tij. Kisha e toponime me emrin e Shëna Vlashit gjejmë edhe sot e kësaj dite në vise të ndryshme të Shqipërisë, duke filluar nga shpella e Shëna Vlashit në Laç tek Kisha e Shna Vlashit në Durrës, e emërtime të tjera. Shenjti është shumë i nderuar edhe në Kosovë.
Kujtojmë se besimtarët i luten Shëna Vlashit, posaçërisht për shërimin nga sëmundjet e grykës, sepse, sipas traditës, ndërmjet shumë mrekullive që bëri, shëroi edhe një fëmijë të vogël, të cilit i kishte ngecur në fyt një halë, që po ia merrte frymën.