Papa Françesku njofton se më 6 qershor do të shtegtojë në Sarajevë
Gjatë lutjes së Engjëllit të Tënzot, në mesditë në Sheshin e Shën Pjetrit në Vatikan,
njoftimi i papritur i Papës Françesku për shtegtimin e tij të ardhshëm në Sarajevë
më datën 6 qershor. Në katekizëm, thirrja drejtuar gjithë të krishterëve që të jenë
“dëgjues” e “kumtues” të Fjalës së Hyjit. Të shtunën, më 6 qershor, në dashtë
Zoti, tha Papa Françesku, do të shkoj në Sarajevë, kryeqytet i Bosnjë-Hercegovinës:
“Ju kërkoj që tani të luteni, që vizita ime në gjirin e këtyre popullsive të
dashura, të jetë inkurajim për besimtarët katolikë, të nxisë tharmet e së mirës e
të kontribuojë për forcimin e vëllazërisë e të paqes”. Njoftimi për shtegtimin
papnor në Sarajevë, përballë mijëra besimtarëve mbledhur në Sheshin e Shën Pjetrit
në Vatikan për lutjen e Engjëllit të Tënzot, u dha menjëherë pas lutjes mariane. E
do të jetë shtegtimi i 11-të i Papës Françesku, në dy vjet papnie, i treti i këtij
viti, pas Sri Lankës e Filipineve, janarin e kaluar e Napolit, parashikuar për 21
marsin e ardhshëm. Më pas Papa Françesku do të shkojë në Torino, më 21 qershor, me
rastin e Ekspozimit të Sindonës dhe në SHBA, për takimin e 8-të botëror të familjeve,
që do të kremtohet në Filadelfia, nga 22 deri më 27 shtator. Në komentin e Liturgjisë
së Fjalës së Zotit të kësaj së diele, Papa Françesku, i frymëzuar nga Ungjilli i ditës,
nënvizoi se Fjala e Hyjit duhet të zërë vendin e parë në jetën e të krishterit. Ajo
duhet dëgjuar, duhet mirëpritur e duhet kumtuar. Siç rrëfen Shën Marku ungjilltar,
Jezusi, pasi hyn në Kafarnao, qyteti më i madh i Galilesë, me bashkësinë e tij të
vogël, nuk ngurron të shkojë menjëherë në sinagogë: “Jezusi nuk e shtyn kumtimin
e Ungjillit për më vonë, nuk mendon më parë të gjejë strehën, natyrisht të nevojshme,
për bashkësinë e tij të vogël, nuk humbet kohë me punë organizative. Shqetësimi i
tij kryesor është komunikimi i Fjalës së Hyjit, me forcën e Shpirtit Shenjt. E njerëzia
e sinagogës mbetet me gojë hapur, sepse Jezusi jepte mësim si një që ka autoritet,
e jo si skribët”. Por, ç’do të thotë “me autoritet”? Do të thotë se në fjalët
njerëzore të Jezusit, ndjehej gjithë forca e Fjalës së Hyjit, ndjehej autoriteti i
vetë Hyjit, frymëzues i Shkrimeve të Shenjta. Ndjehej Fjala e Zotit, e cila e realizon,
atë që thotë: “Sepse Fjala e Hyjit përkon me vullnetin e Tij. Ndërsa ne, shpesh,
shqiptojmë fjalë boshe, pa rrënjë, ose fjalë të kota, që nuk përkojnë fare me të vërtetën.
Ndërsa Fjala e Hyjit përkon plotësisht me të vërtetën, shkrihet me vullnetin e Tij,
e bën, atë që thotë”. “Ungjilli është Fjala e jetës”. Nuk i shtyp njerëzit,
përkundrazi, i çliron ata, që janë skllevër të shpirtrave të këqinj të kësaj bote:
të kotësisë, lakmisë për para, krenarisë, sensualizmit… Ungjilli e ndryshon zemrën,
e ndryshon jetën, i shndërron prirjet për të bërë keq, në mendime për të bërë mirë”.
Ungjilli është në gjendje t’i shndërrojë njerëzit: “Mos harroni! Lexojeni një
fragment të Ungjillit çdo ditë. Është forcë që ndryshon, që shndërron: ndryshon jetën,
ndryshon zemrën”. Prej këndej, thirrja e Papës Françesku drejtuar gjithë të
krishterëve për t’u bërë misionarë e kumtues të Fjalës së Hyjit e, në përfundim, lutja
drejtuar Zojës së Bekuar: “Na mësoftë Ajo të jemi dëgjues të zellshëm e kumtues
autoritarë të Ungjillit të Jezusit”. Pas lutjes së Engjëllit të Tënzot, Papa
kujtoi Ditën kombëtare për jetën, kremtuar sot, në Itali, duke e i vlerësuar lart
të gjithë ata, që e mbrojnë jetën njerëzore si dhe ata, që angazhohen në promovimin
e kulturës së jetës: “Kur ia hapim portat jetës dhe i shërbejmë jetës, ndjehet
forca revolucionare e dashurisë dhe e dhembshurisë, duke përuruar një humanizëm të
ri: humanizmin e solidaritetit, humanizmin e jetës”.