Па ініцыятыве Апостальскага
элемазінарыя, арцыбіскупа Конрада Краеўскага, пачынаючы з 16 лютага 2015 г., у Ватыкане
пачне працаваць цырульня для бяздомных. Шматлікія валанцёры ўжо ахвяравалі ўсе патрэбныя
прылады: нажніцы, брытвы, грабянцы, люстэркі і крэслы. Такім чынам, бяздомныя змогуць
не толькі скарыстацца душавымі кабінкамі і прыбіральнямі, устаноўленымі нядаўна ля
плошчы св. Пятра, але і пастрыгчыся, і пагаліцца. Гэтая паслуга будзе аказвацца па
панядзелках, калі ў звычайных цырульнях выхадны дзень.
Прызначаючы арцыбіскупа
Краеўскага на пост элемазінарыя, папа Францішак заклікаў яго не сядзець за пісьмовым
сталом, а прыносіць канкрэтную карысць абяздоленым. “Тое, да чаго мы імкнёмся – гэта
дапамагчы чалавеку захаваць уласную годнасць, - сказаў папскі элемазінарый у інтэрв’ю
італьянскаму агенцтву ANSA. - Чалавек, які не мае магчымасці памыцца – адрынуты грамадствам.
Вядома, недастаткова прыняць душ і памыць бялізну. Для прафілактыкі хвароб трэба мець
у парадку валасы і бараду. У звычайнай цырульні бяздомнаму ў гэтым часцей за ўсё адмаўляюць
з-за страху заразіць кліентаў хваробамі, напрыклад, каростай”. Улічваючы, што бяздомныя
часта сустракаюцца ў грамадскім транспарце, іх стрыжка прынясе “агульную выгоду ўсяму
гораду”, - перакананы арцыбіскуп Краеўскі.