Dy fjalë për jetëshkrimin e kardinajve të rinj: Imzot Francesco Montenegro
Imzot Francesco Montenegro, kryeipeshkëv i Agrigento-s (Itali), lindi në Mesinë, më
22 maj 1946. Kreu studimet gjimaziale, liceale dhe filozofike e teologjike në Seminarin
Kryeipeshkvnor të Shën Piut X të Mesinës. U shugurua meshtar më 8 gusht 1969, me
inkardinim në kryedioqezën e Mesinës. Ndoqi kurset e Teologjisë baritore pranë
Ignatianum të Mesinës; nga viti 1969 deri më 1971 ushtroi shërbesën meshtarake në
një zonë periferike të qytetit; nga viti 1971 deri më 1988 ishte Sekretar i posaçëm
i Kryeipeshkvijve imzot Francesco Fasola e imzot Ignazio Cannavò. Më 1988-1998
shërbeu si famullitar i Famullisë së Shën Klementit, në Mesinë; ndërsa nga viti 1988,
si Drejtor i Karitasit Dioqezan, Delegat rajonal i Karitasit dhe përfaqësues rajonal
i Karitasit kombëtar. Kreu edhe këto detyra: Mësues i besimit, asistent dioqezan
i Qendrës Sportive Italiane, Drejtor dioqezan i Apostullimit të Uratës, Funksionar
i Kapitullit të Arkimandriatit, Rektor i Kishës-Shenjtërore të Shën Ritës dhe Atë
Shpirtëror i Seminarit të Vogël, Ka qenë edhe Anëtar i Këshilit Presbiterial. Nga
viti 1997, deri në vitin 2000, ishte Pro-Vikar i përgjithshëm i Kryediqezës Mesinë-Lipari-Santa
Lucia del Mela e, nga viti 1998, kanonik i Kapitullit Protometropolitan të Katedrales
së Mesinës. I zgjedhur në Kishën titullare të Aurusulianës, u emërua ndihmës i
Mesina-Lipari Santa Lucia del Mela më 18 mars 2000, duke marrë shugurimin ipeshkvnor
më 29 prill të të njëjtit vit. Nga maji 2003, deri në maj 2008, ishte Kryetar i
Karitasit Italian. Më 23 shkurt 2008 Papa Benedikti XVI e emëroi Kryeipeshkëv Metropolit
të Agrigento-s (Xhirxhento, për arbëreshët). Nga viti 2003 është kryetar i Komisionit
Ipeshkvnor për emigracionin dhe Kryetar i Fondacionit “Migrantes”. Kur e pyetën
si e priti lajmin e madh, u përgjigj: “Posaçërisht me habi, sepse i papritur.
Në të vërtetë e mora vesh pakëz me vonesë, sepse në atë orë po kremtoja e lajmi m’u
komunikua pas meshe. Më çuditi pa masë!”.