Մազարեհ Շեպաայի մէջ Իսրայէլեան ուժերը թիրախ կը դառնան Հըզպալլայի հրթիռներուն

Հըզպալլա, հինգշաբթի. 29 յունուարին, տեսակարար գործողութեամբ մը պատասխանեց Սուրիոյ Քնայթրա շրջանին մէջ Իսրայէլի կատարուած գործողութեան:
Իսրայէլեան ուժերը յայտնեցին, որ իրենց դէմ գործողութիւն մը եղած է Մազարեհ Շեպաայի մէջ` ընդգծելով սակայն, որ այդ գործողութեան ընթացքին իսրայէլացի ոչ մէկ զինուոր գերեվարուած է:
Հըզպալլայի հրապարակած թիւ 1 հաղորդագրութեամբ պաշտօնապէս ստանձնուեցաւ գործողութիւնը:
Հաղորդագրութեան մէջ հաստատուեցաւ, որ երէկ կէսօրէ առաջ ժամը 11:25-ին, Մազարեհ Շեպաայի մէջ, կուսակցութեան «Քնայթրայի նահատակներ» խմբակը հրթիռարձակումի թիրախ դարձուցած է իսրայէլեան բանակի ինը զրահապատներ, որոնք կ՛ընգրկէին իսրայէլացի սպաներ եւ զինուորներ:
Հաղորդագրութեան մէջ նշուեցաւ, որ Հըզպալլա յարմար հրթիռները օգտագործած է` թիրախ դարձնելու համար իսրայէլեան զինուորական մեքենաները:
Իսրայէլեան լրատուամիջոցներ յայտնեցին, որ Հըզպալլա հակազրահապատ հրթիռներ արձակած է իսրայէլեան ուժերուն դէմ եւ պատճառած զոհեր ու վիրաւորներ:
Պատկերասփիւռի «Մայատին» կայանին համաձայն, Մազարեհ Շեպաայի գործողութեան ընթացքին զոհուած են 15 իսրայէլացի զինուորներ:
Ժամեր ետք իսրայէլեան լրատուամիջոցները բաւարարուեցան ըսելով, որ Մազարեհ Շեպաայի գործողութեան ընթացքին սպաննուած են երկու իսրայէլացի զինուորներ, որոնց շարքին` «Կաֆաաթի» ջոկատին մաս կազմող զօրամասի մը հրամանատարը` հազարապետ Եոհայ Քլինկեր եւ յիսնապետ Նինի, ինչպէս նաեւ վիրաւորուած են 7 ուրիշներ:
Իսրայէլեան բանակին հրապարակած հաղորդագրութեան համաձայն, Մազարեհ Շեպաայի մէջ թիրախ դարձած իսրայէլեան շքախումբը բարձրաստիճան զինուորականներու շքախումբ էր:
Գործողութենէն անմիջապէս ետք, իսրայէլեան ուժերը հակադարձեցին ռմբակոծելով լիբանանեան սահմանամերձ շրջանի կարգ մը գիւղաքաղաքներ, ինչպէս` Ապպասիէն, Մաժիտիէն, Մազրաաթ Շանուհը եւ Մազարեհ Շեպաայի մերձակայքը:
Իսրայէլեան թնդանօթներուն կատարած ռմբակոծումին պատճառով սպաննուեցաւ ՖԻՆԻՒԼ-ի միջազգային խաղաղապահ ուժերուն մաս կազմող սպանացի զինուոր մը:
Իսրայէլեան օդուժը իր կարգին թռիչքներ գործեց հարաւային Լիբանանի եւ Կոլանի բարձունքներուն վերեւ: Իսրայէլեան օդուժը երէկ կէսօրին ոչ միայն «Էմ. Քա.» տիպի հետախուզական օդանաւերով թռիչքներ գործեց, այլեւ` «Էֆ. 16» տիպի կործանիչներով:
Միւս կողմէ, իսրայէլեան ծովուժի յածանաւերը խախտեցին լիբանանեան ծովային սահմանները եւ մօտեցան դէպի Սուր:
Նշենք, որ Հըզպալլա իր կարգին ռմբակոծեց Մթըլլէի բնակեցման վայրն ու իսրայէլեան այլ շրջաններ: