2015-01-27 09:50:00

Die Vatikan-Gendarmerie auf Latein: mit Audio


 

Die deutsche Version finden sie hier.

DE PUBLICAE TUTELAE CIVITATIS VATICANAE EXPOSITIONE

Ab Udalrico Nersinger in lingua Theodisca breviter perstricta et a Gerone P(io). Weishaupt in linguam Latinam diligenter versa

Urbem aeternam quotannis decies centena milia hominum visitant. Pietatis et relaxationis causa peregrinatores Aream Petrianam cum petunt pedem ponendo in Civitate Vaticana, multi territorium dicionis ad Italiam pertinens se reliquisse et in terra nulli obnoxia, “Statu nempe Civitatis Vaticanae”, qui sui iuris est, versari nesciunt, neque hanc orbis terrarum minimam civitatem praeter Pontificiam Cohortem Helveticam, cuius nomen longe lateque vagatur, propriam quoque manum custodum publicorum, id est Militum a publica tutela Status Civitatis Vaticanae, manus nempe militum a publica securitate Civitatis Vaticanae, in potestatem habere non edocti sunt. 

Promptissimae turmae dux viris suis postremo gerenda breviter et diligenter explicat. Virorum figurae velatae thoracibusque glandibus propulsandis tectae, postquam capitum motibus nutaverunt et tegiminis cassidum suarum se texerunt, impetu capere incipiunt. Claustrum ianuae obiectum festuca metallica 20 chiliogrammatum pondere gravi diffunditur. Celerrime in loca invadunt viri et paucis tantum post spatii momentis comprehensi sunt impetitores nec iactibus emissis nec pyrobolis accensis. Promptissimae turmae, quae, quod facere poterat, manifestavit, singularis est dominus.

Ignotae promptissimae turmae in manica sinistra vestis suae militaris signum gerunt tiarae clavibus Petri, quae forma crucis fixae sunt, exornatae. In signo manicae dextrae insigne Civitatis Vaticanae monstratur, cui gladium et verba Semper parati supposita sunt. Viri ad securitatis custodum promptissimum agmen militum a publica securitate Civitatis Vaticanae pertinent. Postquam publici custodes electi loca tuta rediderunt, alii particulares vigiles celeres succedunt. „Turma promptissima terroribus adversandis“ displodendi potentiae pyrobolorum accensorum, qui tuti redditi sunt, celeriter adimendae providet.    

Excercitia militum a publica tutela Civitatis Vaticanae, qui in armis utendis particulariter instituti sunt, pericula solito maiora excipiunt, a quibus nostra aetate neque Civitas Vaticana tuta esse potest. Nam muris altis Civitatis Ecclesiae neque petitiones neque terrores prohiberi possunt. Ordinariis autem in vitae adiunctis militibus a publica securitate Summi Pontificis alia praestanda sunt.  Quorum praefectus, Dominicus Giani nomine, inculcat: „Milites a publica tutela Civitatis Vaticanae pluribus funguntur muneribus, in minima quidem orbis civitate illis militum viatoriorum, criminalium, iudicialium et limitaneorum.  Maxime autem“, inquit, „ad eos tutela Summi Pontificis atque aliorum, qui ad eum adeunt, pertinet.“ 

Pontificios custodes ordinis labores non deficiunt. Quotannis undeviginti fere milia pietatis et relaxationis causa peregrinatorum Basilicam Vaticanam et Musea Vaticana adeunt numero militum centum nonaginta octo statuto. Magna hominum multitudo opus, quod a milibus a tutela publica peragitur, haud facile est. Praeterea in Basilicis Sanctae Mariae Maioris, Sancti Pauli extra muros, in aede Laterana, in Arce Gandulphi, quae est secessus Pontificum Romanorum aestivus, in aliisque aedificiis, quae dicione aliena sunt immunes, adesse debent. „Ex tantis visendi causas venientibus non omnino mirandum est, quod nos pro statu plurimorum delictorum in toto orbe terrarum commissorum habemur“, quod respiciendum esse milites a publica securitate dicunt in memoriam revocantes numerum scilicet ex proportionalitate delictorum - fere solummodo furtorum perularum et marsupiorum – numero incolarum cuiusdam regionis effici.

Qui Civitatem Vaticanam ad Portam Sanctae Annae ingreditur, postquam primum a Cohorte Helvetica inspectus est, de civilis Ecclesiae dominatus officiis cohorti a publica tutela impositis sciscitari potest. Hic milites a publica securitate vehiculorum commeatum dirigunt, cum eis non solum oculi in normas ad vehicolorum ductum moderandum statutas coniciendi, sed autoraedariorum tesserae diligenter inspiciendae sint. Quorum quoque collegis, qui vehiculorum expertes inspiciunt, eadem est laboribus sors. Advenientes etiam atque etiam adhortari debent, ut adeundi potestatem monstrent, et eum, qui illa non gaudet, ad officium facultati transeundi praeparandae ducunt. Custodiae praefectus, qui in vigilario est, arte diversis muneribus simul fungendi auctus esse debet: continuo per telephonium continuo colloquitur, nuntiis per radiotelephoniam communicatis auscultat, alba televisifica inspectionis, quibus televisifice vigilantia peragitur, semper aspicit et tamen benigne cum eis loquitur, qui eum, ut auxilium eis praestet, adeunt.

Civitatis Vaticanae vigilantia ab ea, quae Italice „Sala operativa“ appellatur et prope Portam Sanctae Annae in statione militum a publica tutela est, ordinatur. Per quinquaginta alba televisifica officiales omnem fere locum Civitatis Vaticanae conspicere possunt. Quingenti circiter instrumentis magnetoscopicis omnes, qui pedes in Civitate Vaticana ponunt aut eam relinquunt, percipiuntur. Hoc apparatu suspecti spatio temporis, quod cum rerum veritate congruit, et electronice investigari et imaginibus luce impressis in indiciorum thesauro comparari possunt. Sed haec custodia non solum usui est inspectionis Civitatis Vaticanae a publicae securitatis custodibus peractae, sed eadem etiam casus necessitatis conspici debent. Quo fit, ut impeditum sit, ne quidam mortem voluntariam sibi conscisciturus de tholo Basilicae Vaticanae in profundum se praecipitaret. Cum mensibus aestatis aestuosis in scalis cochleatis, quibus ad tholum adducitur, accidit, ut vires visitatores saepe improviso deficiant, televisificis machinis numerosis auxilia eis, qui afflicti sunt, praestari potest.  

Ad vestes coloribus eminentes et armas mediavales commoventes Cohortis Helveticae Milites a publica tutela Civitatis Vaticanae non pares sunt. Sed eorum quoque vestibus militaribus visitatores civilis Ecclesiae dominatus commoventur. Custodes Civitatis Vaticanae vestibus militaribus purpureis necnon pileo baccula praedito eiusdem coloris induti sunt, cui insigne pontificium coloresque Civitatis Vaticanae texta sunt. Manuballista, quae vulgo „Beretta automatica“ diametri 7, 65 vocatur, armati sunt. Iuvenis, qui manum Militum a publica tutela Civitatis Vaticanae ingredi vult, virilis, inter annum vicesimum primum et quintum natus et valenti firmaque natura esse debet. Magnitudine corporis non minor esse debet quam 178 cm. Caelebs, diplomate scholae, quae vulgo Scuola media superiore vocatur, aut alio testimonio ei simili insignatus esse, fidem catholicam exercere et litteras commendatitias a quodam presbytero confectas proponere debet.

Omnino necessarium est, ut candidati, qui tirocinium biennii deponunt, christianum nomen vita profiteantur et se in fidem impendant. Davidi Giulieti, Militum a publica tutela praefecti adiuncto, constat: „Quando hic laboras non saltem paulum credens, cui laboras? Si Summo Pontifici inservis, personam eius credis. Hunc qui non credit, eum falso munere fungi puto“.  In nulla vix alia manu vigilium praefecti subiectis hac re exemplo sunt. Praefectus Militum a publica tutela, suus vicem gerens et praepositorum coetus (Ausprache: cötus) potestate sua non superiores esse putant, ut una cum militibus praepositis Cohortis Helveticae, cum Papa multos loquendi precandique causa in Area Patriana admittit et publice in conspectum venit, iuxta currum Summi Pontificis eant aut currant. 

Sciunt Summi Pontifices suam protectionem eamque Civitatis Vaticanae a militibus a publica tutela in tuto collocatam  esse. Fiducia Pontificis regentis erga eius angelos custodes saeculares in eo manifestatur, quod Franciscus Papa inde ab initio sui pontifcatus, cum in Civitate Vaticana vehitur, autocineto militum a tutela publica utitur. Iam decessor Beatissimi Patris, Benedictus XVI Papa, ipse filius militis a tutela publica, custodibus ordinis gratiam retulit pro eo, „quod una cum Cohorte Helvetica cottidie magno cum magnitudine animi et fide facitis, ut Summo Pontifici eisque, qui operam ei praestant, operam navetis, ut pacem et ordinem in Civitate Vaticana in tuto collocetis et pietatis causa peregrinatores excipiatis, qui sepulchra Apostolorum adire et successorem Petri convenire volunt. … Difficilem et pernecessariam operam praestatis, quae deditionem, prudentiam et adiuvandi voluntatem exposcit.

Sacramenti verba

„Sacramento dico me munere Petrino fungenti eique iure succedenti fide et totis viribus serviturum. Praeterea promitto me praefectum ceterosque praepositos reveriturum eisque fidem servaturum, oboedientiam praestaturum omniaque, quae ordinis mei sint, observaturum."

Militum a publica tutela precatio

Deus immensae bonitatis, qui nobis amorem Tuum paternum Filium Tuum Unigentum et Spiritum Sanctum donando revelasti, nostram accipe precationem, quam ad Te dirigimus quamque Sancti Angeli maiestati Tuae divinae afferant. Da, ut Sanctus Michael, magnus caeli princeps, eiusque Angeli surgant, qui filios Tui populi defendant, ut instrumenta Tuae sint benedictionis pro Summo Pontifice …, pro pastoribus et christifidelibus Ecclesiae, pro militibus a publica securitate nostrisque familiis. Utinam in Sancti Petri successore et Sede Apostolica servandis et defendendis servientes cooperatores Tui Angeli digni et digni magis et efficaces et efficaces magis evadamus. Tuus Archangelus Michael, defensor amicorum Dei, nobis adsit, ut ab insidiis mali in operibus nostris cotidianis et in horis noctis prohibeamur. Maria, Regina Angelorum, pro nobis intercedat, quae in gloriam caeli assumpta tamquam signum clare fulgens collustret protegatque nostras vias. Pro his omnibus Te deprecamur in nomine et per amorem Christi, Domini nostri. Amen.

De huius expositionis scriptoribus

 

UDALRICUS NERSINGER

Diplomate in Sacra Theologica ornatus

Rerum Vaticanarum peritissimus

Variorum librorum auctor

GERO P. WEISHAUPT

Dioeceseos Ruremundensis sacerdos

Iuris Canonici peritus

Linguae Latinae cultor

 

(rv 27.01.2015 un/gpw)








All the contents on this site are copyrighted ©.