Papa në Engjëllin e Tënzot: Jezusi dëshiron që të krishterët të jenë të bashkuar
Të vijojë lutja për bashkimin e të krishterëve e të rifillojnë, në Ukrainën lindore,
përpjekjet e dialogut, për t’i dhënë fund konfliktit. Këto, thirrjet e Papës Françesku
sot, gjatë lutjes së Engjëllit të Tënzot, në ditën kur përfundon Java e lutjes për
bashkimin e të krishterëve. Hyji, tha Papa, ka etje për ne; është djalli, ati i të
gjitha përçarjeve. Të krishterët
duhet të jenë të bashkuar Jezusi dëshiron që të krishterët të jenë të bashkuar.
Këtë nënvizoi Papa, pasi kujtoi se pasdite, në Bazilikën romake të Shën Palit jashtë
Mureve, do të mbahet kremtimi përfundimtar i Javës së lutjes për bashkimin e të krishterëve: “Është
gjë e keqe që të krishterët janë të ndarë. Jezusi na do të bashkuar; një korp i vetëm.
Mëkatet tona, historia, na ndanë e prandaj duhet të lutemi shumë, që të na bashkojë
rishtas vetë Shpirti Shenjt”. Djalli, atë i gjithë përçarjeve Në
Zemrën e Krishtit, shtoi Papa, takohen etja njerëzore e ajo hyjnore, me etjen për
bashkim: “Eh, ajo që deshi Krishti: bashkimi i të gjithëve! Djalli, e dimë, është
babai i përçarjeve, është ai, që ndan gjithnjë, që bën luftëra, që bën keq!”. Thirrja
për Ukrainën Papa, pastaj, shprehu shqetësimin e tij për situatën në Ukrainë,
duke uruar të marrë fund sa më shpejt çdo formë e dhunës: “Ndjek me shqetësim të
thellë ashpërsimin e ndeshjeve në Ukrainën lindore, që vijojnë të shkaktojnë shumë
viktima ndërmjet popullsive civile. Ndërsa siguroj lutjen time për ata, që vuajnë,
bëj përsëri thirrje të rifillojnë përpjekjet për dialog e t’u jepet fund veprimeve
luftarake". Jezusi është Fjala e gjallë Duke kujtuar Ungjillin e sotëm,
që flet për fillimin e predikimit të Jezusit në Galile, Papa nënvizoi se Krishti është
“Fjala e gjallë e vepruese në histori”, që e shuan etjen e zemrës sonë të shqetë: “Jezusi
është përmbushja e premtimeve hyjnore, sepse Ai ia dhuron njeriut Shpirtin Shenjt,
ujin e gjallë, që shuan etjen e zemrës sonë të trazuar, të etur për jetë, për dashuri,
liri, paqe, të etur për Hyjin”. Hyji ka etje për ne Hyji, duke u bërë
njeri, shtoi Ati i Shenjtë, e bëri të vetën etjen tonë, jo vetëm për ujë material,
por sidomos etjen për një jetë të plotë, të lirë nga skllavëria e së keqes dhe e vdekjes: “Njëkohësisht,
duke u mishëruar, Hyji e vuri etjen e tij - sepse edhe Hyji ka etje - në zemrën e
një njeriu: Jezusit të Nazaretit. Hyji, që ka etje për ne, për zemrat tona, për dashurinë
tonë, e vuri këtë etje në Zemrën e Krishtit”. Pas lutjes së Engjëllit të Tënzot Pas
lutjes së Engjëllit të Tënzot, duke kujtuar se sot kremtohet Dita botërore e të sëmurëve
nga gërbula, Papa u shprehu afërsinë e tij gjithë njerëzve, që vuajnë nga kjo sëmundje.
Ati i Shenjtë përshëndeti, pastaj, bashkësinë filipinase të Romës, duke kujtuar se
populli filipinas është i mrekullueshëm për fenë e tij plot forcë e gëzim. Pastaj
iu drejtua edhe të rinjve e të rejave të Veprimit Katolik të Romës (Acr), të pranishëm
me shumicë në përfundim të “Karvanit të Paqes”, organizuar sot prej tyre. I porositi
të gjithë ta vijojnë me gëzim ecjen në udhën e krishterë. Njëra nga vajzat e Veprimit
Katolik, Sara, lexoi një mesazh për paqen: “Ne të gjithë jemi skuadër shkencëtarësh,
të angazhuar në një laborator vigan, që është bota. Vetëm duke punuar së bashku, si
duhet, e duke realizuar me fund projektet tona të paqes, mund ta bëjmë konkrete paqen
universale, menduar për ne nga Zoti”.