Споведзь – гэта не
суд, а сустрэча з Богам, які даруе ўсе грахі таго, хто нястомна моліць Яго аб міласэрнасці,
адзначыў папа Францішак 23 студзеня 2015 г. падчас ранішняй Эўхарыстыі ў Ватыкане.
У сваёй гаміліі Пантыфік паразважаў над урыўкам з Ліста да Габрэяў, у якім гаворыцца
пра “новы запавет” паміж Богам і абраным народам. У аснове гэтага запавету, па словах
Папы, ляжыць прабачэнне. “Бог даруе заўсёды! Ён не стамляецца дараваць. Гэта мы стамляемся
прасіць прабачэння”, – сказаў Святы Айцец. “Калі ты шмат грашыў, нарабіў у жыцці шмат
дрэннага, але ў канцы пакаяўся, то прасі прабачэння, і Ён даруе!”. На думку Папы,
гэтага досыць, “ніякай платы больш не трэба”, таму што за нас ужо заплаціў Езус”.
Папа прывёў прыклад блуднага сына, які рыхтаваўся да сустрэчы з бацькам, а той нават
не даў яму раскрыць рот, проста моцна сціснуў яго ў абдымках.
“Няма граху,
які б не прабачыў Бог,” – сказаў Папа. На яго думку, гэтак жа павінны паступаць і
святары, якія прымаюць споведзь: дараваць чалавеку грахі і забывацца пра іх. Споведзь
– гэта не суд, а сустрэча. Пантыфік са смуткам адзначыў, што нярэдка споведзь ператвараецца
ў механічную фармальнасць. Неабходна вучыць моладзь таму, што ісці на споведзь трэба
не як у хімчыстку, дзе цябе адчысцяць ад плям, але як на сустрэчу з Богам, Які абдымае
і даруе, лічыць Святы Айцец.