Прадстаўнік Святога Пасаду: Папа адчувае “здзіўленне і шкадаванне” у сувязі з інтэрпрэтацыяй
яго слоў
“Здзіўленне і шкадаванне”
адчувае папа Францішак у сувязі з інтэрпрэтацыяй слоў, прамоўленных ім падчас прэс-канферэнцыі
на борце самалёта на шляху з Манілы ў Рым. Аб гэтым у інтэрв’ю італьянскай каталіцкай
газеце “Avvenire” паведаміў субстытут Святога Пасаду арцыбіскуп Анджэла Бэчу. Пантыфік
“здзіўлены” тым фактам, што яго словы, адмыслова выказаныя простай штодзённай мовай,
у многіх сродках масавай інфармацыі былі пазбаўлены шырокага кантэксту. Ён адчувае
шкадаванне ў сувязі з “замяшаннем”, дэзарыентацыяй, якую выклікалі гэтыя словы, адзначыў
вытыканскі іерарх. Святы Айцец ні ў якім разе не жадаў паставіць пад сумнеў прыгажосць
і каштоўнасць шматдзетных сем’яў. Сёння падчас агульнай аўдыенцыі ён заявіў, што шмат
дзяцей – гэта дар Божы, за які трэба быць удзячнымі.
На яго думку, фразу Святога
Айца трэба інтэрпрэтаваць у тым сэнсе, што працягваючы свой род, чалавек не павінен
кіравацца логікай жывёльнага інстынкту. Гэта павінен быць адказны ўчынак, заснаваны
“на каханні і ўзаемным дарэнні сябе”. На жаль, сучасная культура часта прымяншае сапраўдную
прыгажосць і высокую каштоўнасць сужэнскага кахання, з усімі вынікаючымі з гэтага
адмоўнымі наступствамі, заўважыў пурпурат.
Што тычыцца фразы пра трое дзяцей,
папа Францішак ніякім чынам не хацеў сказаць, што гэта “правільная” колькасць дзяцей
у сям’і. Трое дзяцей – гэты той узровень нараджальнасці, які, на думку сацыёлагаў
і дэмографаў, дазваляе гарантаваць стабільнасць насельніцтва. Але кожная хрысціянская
пара павінна сама вырашаць, з улікам цэлага шэрагу мірскіх і боскіх умоў, колькі дзяцей
мець, падкрэсліў кардынал Бэчу.