Ati i Shenjtë: mos u shkurajoni nga rreziqet, që shqetësojnë njerëzimin
Papa Françesku priti sot në audiencë personelin e Inspektoriatit të Sigurimit Publik,
që punon pranë Vatikanit. Rasti qe shkëmbimi i urimeve për Vitin e Ri. Sivjet, policia
italiane që shërben në zonat përreth Shën Pjetrit, kremton 70-vjetorin e pranisë së
saj. Ati i Shenjtë nuk mungoi t’i referohej gjendjes aktuale botërore: “Në horizont
shohim hije e rreziqe, që e shqetësojnë njerëzimin. Si të krishterë, jemi të thirrur
të mos e humbim toruan e të mos shkurajohemi. Shpresa jonë mbështetet mbi një shkëmb
të patundur: mbi dashurinë e Zotit, zbuluar e dhuruar në Jezu Krishtin, Zotin tonë.
T’i kujtojmë fjalët ngushëlluese të Shën Palit Apostull: ‘Kush do të na ndajë prej
dashurisë së Krishtit? Vështirësia? Ngushtica? Salvimi? Uria? Zhveshtësia? Rreziku?
Shpata? …E prapëseprapë, në të gjitha këto, jemi më tepër se ngadhënjyes, në saje
të Atij që na ka dashur’(Rm 8,35.37)”. Policia italiane, vijoi Papa, ka për
detyrë të ruajë vende me rëndësi të madhe për fenë e për jetën e miliona shtegtarëve,
të cilët shpesh kanë nevojë për ndihmë: “Secili duhet ta ndjejë se prania dhe
kujdesi juaj i ndihmon dhe i mbron. …Jemi të gjithë të thirrur ta ruajmë të afërmin.
Zoti do të na kërkojë llogari për përgjegjësinë që na ka besuar, për të mirën apo
të keqen që kemi bërë ndaj të afërmit”. Në fund, Papa ua besoi vetë policët
si edhe shqetësimet e shpresat e tyre, mbrojtjes amnore të Zojës së Bekuar.